Auleria Wakudumo
Okakomitiye komutumba wopashiwana oko haka ungaunga nehongo oka holola kutya onghalo yomihandjo dovanafikola moitukulwa yokonooli ya nyaipala nomihandjo dimwe odili monghalo itai dulu okulididimikilwa.
Okakomitiye oka holola ngaho pefimbo ta ka yandje olopota momutumba wopashiwana oshivike sha dja ko.
Olopota ya tya ngaha, oya shikula etalele po lokakomitiye komihandjo deefikola da yooloka moitukulwa: Kunene, Otjozondjupa, Ohangwena, Oshikoto, oshoyo Kavango West. Okakomitiye oka talela po eefikola edi opo ka dule okutala exumokomesho la ningwa po okudja nghee va talela po omihandjo edi mo2022. Neudo, okakomitiye oka talela po omihandjo hetatu moitukulwa ya tumbulwa metetekelo.
Okakomitiye oka holola kutya epangelo ola longa koxulo yonyala okuyambula po omihandjo okudja nghene va ninga olopota yomaudjuu mo2022. Omihandjo dihapu odili natango meenghalo omo dali dili okudja mo2022 nadimwe da nyaipalelela ngaho nee. Omaundjuu a tofwa okudja komihandjo hetatu odo da talelwa po neudo ongaashi: omihandjo dihapu natango odili monghalo omo veli ve di fiya mo2022, dimwe oda nyaipalelela molwa ekwatafano inali wana pokati kouministeli wehongo neembelewa dehongo moitukulwa.
Ofikola Etanga Primary moshitukulwa shaKunene, ovahongwa natango ohava nangala meengulu dofikola dokulihongela. Okakomitiye oka ti ovanafikola ova kala nokunangala meengulu oule weedula 11 da ka dilongela.
“Ofikola oya taalela natango omashongo omeva. Ohava longifa omavela okuteka omeva ngaashi paife omeva taa ende nokupwiinina,” taka holola ngaho.
Okakomitiye oka twikila taka ti omuhandjo mupe oo wa tungwa pofikola nekwafo lakansela wavo vati natango inau pyakudukwa okulongifwa shaashi omeva inaa fika natango molwa oshimaliwa.
Natango, ofikola Onkumbula Combined moshitukulwa shaShikoto oya taalela eshongo lofina yovahongwa pofikola. Ofikola oina vati ovahongwa 900. Omuhandjo tau tungwa pofikola nao inau pwa fiyo onena. Ovahongwa kofikola Hainyeko Combined mOhangwena onghene tava twikile okudja monghalo ii momuhandjo wofikola. Ovahongwa ohava di momuhandjo woipeleki oshoyo outenda va dikwa pofikola. Ovahongwa oveli limo vati va finana, kape na eembete, oikwatelifi ya wana momuhandjo.
Omanga moshitukulwa Kavango West, ofikola Kasivi Combined oyili monghalo itau dulu okulididimikilwa.
Omuhandjo wavo ohau tambula ashike ovahongwa 40, eshi ohashi fininiki vahapu va dje komaumbo omanga moZambezi pofikola Sesheke Combined pena omhumbwe yomeva molwa epaipi domeva odo da hanaunwa po kovakwashiwana.
Moshitukulwa shaTjozondjupa, eefikola dopedu Auuns noBerg-Aukhas nando onga dikwao. Omihandjo odili monghalo ya nyaika, ovahongwa va hapu unene, oundjuwo itava longo nomuhandjo kauna omatalashe okunangala ovahongwa.
Ofikola ei vati oya kala monghalo ei oule weedula 18 paife.
Okakomitiye oka indila epangelo opo li katuke onghatu yomeendelelo opo va yambule po onghalo yomihandjo edi.
Oka indila yo epangelo opo li wedele oshimaliwa osho hava yandje keshe kokaana shaashi vati natango oshili ashike po N$22mokaana.
-wakudumoauleria@gmail.com