Lisony Njembo

Omuhungirirepo wOfather Tjijombo St. John Faith Mission, nu wina nguri omuhonge omunene wokehi, Ngahahe TJiposa, ma ningire ouṋepo wombongo okukukuta ne u huhumiṋa moruveze rouzeu woruhoze ombongo mu iri nai. 

Ronḓiro yOatjambitjopa, omuyaruke Julius Hoveka. Ngu ma suvisiwa Osondaha ndi mOsukkelaara mOkarukondwa kOmatoororero ka Tjombinḓe mOrukondwa rwa Maheke. “Matu undjireko ozondambo ze zomaunguriro wakumwe otjotjimbumba okukayenda komurungu pokati kovaungure nouṋepo nandarire monḓiro yOatjambitjopa,” Ngahahe ma tja. 

Omuhonge Hoveka wa ṱire tji ya ri yane komueze mbwi, ndiri Oritjavari nda zuko kombunda youvere ousupi monamiti ya Katutura mOtjomuise. Tja utukisirwe okuza koye a yetwa mEpako, Epako ari mu hindi kOtjomuise. Wa toororwa otjomuhonge omunenenene wombongo ndji, otjOatjambitjopa. Wa toororwa tji ya ri yame ku Tjikukutu ombura ndja zuko (2024), okuyaruka moruveze romuyaruke nomuute wombongo ndji, Petrus Katikisa Tjijombo, ngwa ṱire mo-2023. 

Tjijombo ngwa uta noruhindo rwe rongamburiro mo 1953 okuutira koruvanda. Okuza kourengowona we, Hoveka wa kara popezu na Tjijombo na ungura otjiṱuve notjiṱuve nOuhonapare wOmbazu wOvambanderu. Wina wari okaṋepo na kara norupa orunene momautiro worutavi rombongo ndji mOmaueuozonjanda mEpukiro. Oyo nge munika nokuvarwa ouparanga i yorupa rumwe rotjiwaṋa tjOvambanderu otjeha rombongo. Omuyaruke Hoveka wa kwaterwa mOmaueuozonjanda na tjindire kOtjombinḓe.