Auleria Wakudumo
ONDOBE YOMUNGHUDI – Ofikola yaImmanuel Uahengo Combined oi na eemhumbwe detanga lokeemhadi ngaashi omatanga, eenete dokoitenda yeekoola, eeshiva, omudjalo wetanga lokeemhadi osho yo eenghaku dovadanitanga veedula 13 fiyo 15 naikwao ihapu.
Ofikola Immanuel Uahengo Combined oi li membwida laKambebe, moshikandjohongo shaNdola, moshitukulwa shaHangwena.
Mewiliko lomukulunhufikola, Olivia Shinana nomukokololi wospaana yetanga lokeemhadi, omuhongi, Daniel Henghono, ofikola oya shivika nawa mokatanga kokeemhadi moshikandjohongo osho yo moshikutukulwa shaHangwena ashishe.
Pandjokonona yetanga lokeemhadi, ofikola oya kala ashike ya tala kovahongwa vondodo onhihetatu nonhimuwoyi, shaashi ovo va talika ko va kasha nove na omakipa a kola dokudana etanga. Ashike okutameka odula yo-2024, oupeko oye va shendja. Ofikola oya tota po ospaana youmati veedula 13 fiyo 15. Elalakano oku va deula, va pyokoke manga vanini elela vo va longekidilwe okuya mospana yakula yofikola. Osho sha eta efiyafano liwa shaashi ovadani vospana inini otava longo noudiinini va dule okutambulilwa nokuyelwa va ye kospana yakula pofikola. Molwouhapu weespana novadani, ofikola oye lihanga tai nane nombali moikwa noipangifo yokudeula ovadanitanga veespana dopavali. Ofikola kai na omatanga a henena okudeula eespana mbali, eeshiva nado inadi wana, oupandela vomeehuke dokapale kape na sha, omidjalo detanga nado otadi pumbiwa, ngee nee oumbidja vomhepo vomadeulo, naunene ovadanauki kave na eenghaku detanga, osho tashi imbi ovadani va dane nemanguluko vo va ulike oshitalendi shavo shetanga vo va hange ondjodifikilo yavo yokudanena dimwe domeespana dakula moshilongo.
Eespana adishe dopavali oda kufa ombinga momaudano ane neudo, omo de shi pondola okuvena outivali lutatu osho yo outitatu lumwe.
Oidjemo oyo otai holola ondjungu yovadani, elitulemo, elongelokumwe, ohokwe nohole yetanga lokeemhadi. Shihafifa osheshi vahapu vomovadanitanga ovo tuu hava ningi nawa nomoilongwa yavo yofikola. Onghee omudeuli ota indile nelininipiko kOvasamaria Ovanamutimanghenda novaholi vomaudano ovo tava dulu, va kwafele ofikola meemhumbwe dayo doikwa noipangifo yetanga lokeemhadi.