Hilma Nalupe

Namibia okwa dhengwa yimwe nopevi kuComoros sho ya dhana oshikando shotango moMoroni shaComoros mEtitano lya zi ko.

Ali Aboubacar okwa tula mo okoola mominute 84 nokukwashilipaleka kutya Comoros okwa sindana po uudhano mboka wokatanga kokoompadhi.

Nonando iizemo mbika itayi nyanyudha, ndjika oya li ompito ombwaanawa kaadhewuli ya mone mpoka ye na okwoopaleka omapuko, osho wo okutala ngele aadhani oya ilongekidha tuu nawa. Oosipana ndhika otadhi ki itaalela ishewe nena pokapale kedhina Malouzini Omnisports Stadium moMoroni, Comoros. Uudhano mbuka otau ka pa osipana yoBrave Warriors, ngaashi ya tseyika nawa, ompito ishewe ya tale ngele genongo taga fe gongombe. Uudhano mbuka owa gandja wo ompito kaadhani yamwe opo ya dhane uudhano wawo wotango wopaigwana.

Omudheuli gwaNamibia John Sikerete okwa ti osha enda nawa nonande ya dhengwa. “Osha li ontseyo ombwaanawa kaadhani yetu oyendji mboka haya dhana meni lyoshilongo, mboka ya dhana oshikando shotango naadhani mboka ye li ponkatu yopaigwana, oshoka aadhani ayehe yaComoros ihaya dhanene moshilong,” ta ti ngaaka.

-hnalupe@nepc.com.na