Aakalimo pamwe nopolisi moshitopolwa shaShana oya taalela omaupyakadhi giimbuluma, mbyoka tayi ende tayi indjipala, noya pimbila ethimbo ndika lyuka kehulilo lyomumvo.

Omupevikuluntu gwopolisi moshitopolwa shaShana Frederick Ndjadila, okwa ningi esiku ta lopota iimbuluma tayi holoka moshitopolwa.

Ta ti, iimbuluma oya indjipala, aafuthi otaya longitha ompito kehe okuyuga aakwashigwana iimaliwa yawo, iihauto osho wo okuteya omagumbo.

“Otwa ningi esiku tatu lopetelwa omagumbo taga teywa, gamwe oga kuthwa iinima omanga ooyene ye li mo omanga yamwe ya thigi omagumbo gaa na aantu,” ta ti ngaaka.

Okwa ti, oya lopotelwa wo iihauto tayi teywa, tayi kuthwa iilongitho osho wo kehe shoka shi li mo shongushu.

Ndjadila okwa ti oshigwana nashi kale wo sha kotokela aahingi yoohauto ngele taya faalelwa oshoka yamwe itaya felefula shili. “Oshigwana nashi kale aluhe shi na oonomola dhopolisi, sho nashi longele kumwe naashiinda uuna pe na omayinyengo taga limbililike ya tseyithilathane osho wo opolisi,” ta kumagidha ngaaka.

Omukalimo gomolukanda Evululuko Timoteus Shindama,oshiwike sha zi ko okwa penduka anuwa negumbo lya yela, iinima ayihe ya tumbwa mo kaafuthi omanga a kotha.

“Onda lala nda pata iinima ayihe, inandi uva nando omayinyengo gasha,” ta popi ngaaka.

Ta ti, ke na shoka a thigilwa po kakele kombete ndjoka a li a lala.

Opolisi yaShana otayi kumagidha oshigwana shi longele kumwe nopolisi okumanga aafuthi mboka osho wo okulopota mbala uuna sha mono iilonga yi li ngaaka tayi holoka.

Tayi ti aantu mboka oya pumbwa okumangwa opo ya ze mo mokati koshigwana. 

-vkaapanda@nepc.com.na