Auleria Wakudumo
Omuprima woshilongo Elijah Ngurare okwa holola olupandu kofikola Okankolo Combined moshitukulwa shaShikoto eshi va wedela ko komuhandjo wovalongwa obloka imwe oshoyo onhele yokutelekela.
“Ohandi pandula ovakalimo vomomudingonoko waKankolo oshoyo elelo lofikola eshi la longa noudiinini okukwashilipaleka kutya ovahongwa ova mona omuhandjo oshoyo onhele yokutelekela,” Omuprima ta holola ngaho.
Eshi omuprima okwe shi holola pefimbo ta talele po Okankolo Combined School moshitukulwa shaShikoto.
Nande ongaho, omuprima okwa ti, onghalo yomihandjo meefikola oili tai mu udifa nai natango. Okwa ti, eefikola dimwe natango kadina omihandjo nonande ondili momhumbwe. Edi dina omihandjo, efimbo limwe inadi wanena ovahongwa aveshe osho hashi eta efinano lavo monduda imwe.
Omuprima okwa indila eefikola oshoyo ovakwashiwana opo va kufe ombinga moprograma yashanakulya oshakulonga opo va kwafele okuyambula po opate oyo tai tungwa pokati kOnkumbula nOkankolo oshoyo okukwafela okumana omuhandjo wovahondja.
Shanakulya oshanakulonga oprograma oyo opo ya nyumunwa kepangelo okukwafa oshiwana pamukalo woshimaliwa noipalwifa.
Shanakulya oshanakulonga oo omukalo wokukwafa ovanhu unene ovo veli komikunda va mone oyuuyemo mokulonga nokuyambula po omidingonoko davo vene.
Oprograma ei otai ka futa ovanhu vati N$118 mefiku ngeenge va longa.
Elalakano lashanakulya oshanakulonga okukwafa ovanhu va mone oyuuyemo omanga tava yambula po exumokomesho momidingonoko davo.
“Pamukalo ou, ovanhu otava yambula po enghalo davo, tava mono oyuuyemo,okukwafela eeproyeka dexumokomesho momidingonoko davo ngaashi eefikola, eepate, omeva, nakeshe shimwe tashi tungwa pomudingonoko,” Ngurare ta ti ngaho.