Matheus David
Okakadona dingi Johanna Swartbooi oka holola olupandu kOvanamibia aveshe eshi va kala nokumuyambidida omanga ta kwandjangele nefiyafano lokakadona dingi mounyuni koThailand.
“Onda penduka noshilongo shange komutima. Onda pandula eshi mwa yambididange pefimbo loshiindingili eshi. Ondi mu hole vaNamibia. Omwa kala nokukumikange nokuxwaxwamekange efiku keshe opo ndi dule kukala ndina eenghono pefimbo eli. Otu li mexulilo shivike lefiyafano letu. Ame ondi li lepo oshilongo shetu. Eshi kashifi aike ondjodi yange, ndele oyaNamibia,” Swarbooi ta holola ngaho.
Swartbooi nonande a kala nokunyanyula vahapu mokweenda kwaye, ineshi pondola okuya mongudu youkadona dingi 30 mounyuni omo hamu ka hoololwa oukadona 12 dingi, taku shikula oukadona vatano dingi fiyo osheshi omufindani a djalekwa oshilimbo shaye.
Neudo, Fatima Bosch Fernandez , ondona yaMexico oyeshi pondola okuyangata po oshishani shokakadona dingi mounyuni.
Okakadona komido 29 kaThailand, Praveernar Singh, okashikula okakadona dingi, nolwanima nakatyepa wokoVenezuela, Stephany Adriana Abasali Nasser okweya omutitatu mefiyafano eli.
Efiyafano eli ola li oikando omi74 , omo eendona da dja koilongo ya yooloka da li tadi mwenyeke nokushambula ovatali novalanduli vefiyafano lokakadona dingi mounyuni.
Mo2024 , okakadona dingi moNamibia, Prisca Anyolo okwa li yoo ka tumwa kaka kalelepo oshilongo mefiyafano lokakadona dingi mounyuni koMexico.
Nonande Swartbooi oinima inai mu endela nawa kuMiss Universe, moshitunda shetu oye eli a yangatapo efiyafano lokakadona dingi okaNamibia pefimbo lomaulikilo oipindi mOngwediva.