Uuministeli womauyelele nomakwatathano gopaungomba owa pititha omushangwa kutya esiku lyomahogololo gookansela yiitopolwa nomalelo goondoolopa Etitatu lyoshiwike tashi ya mo26 Novomba, itaku longwa.
Epangelo olya nunina esiku ndyoka koshigwana opo shi mone ompito yoku ka hogololola osho wo okuulika uuthemba wawo.
Omukuluntu gwokomisi yomahogololo moshilongo (ECN) Peter Shaama okwa ti oya longekidha omahala ga gwana gomahogololo oshilongo ashihe
“Omahala gokuhogololela oga andjagakanithwa miikandjohogololo ayihe 121 moshilongo. Okwa ndhindhilikwa aantu ye li 1 499 449 yi inyolitha okuhogololo aaleli yiikandjohogololo 120 osho wo ye li 752 043 yi inyolitha okuhogolola aaleli yomalelo goondoolopa ge li 59,” ta fatulula ngaaka.
Okwa fatulula wo kutya nuumvo otapu ka longithwa uushina wokundhindhilika uuyelele awuhe notapu ka kala omilandu opo ewi lyi vule okuyalulwa,”Shaama ta fatulula.
Ta ti, oshinima shoka shi li po, ooshoka kutya Aanamibia oye na okuninga etokolo lyehogololo lyawo ndyoka tali vulu oku ka kala lya eta elunduluko moonkalamwenyo dhawo muule womukokomoko gwethimbo ndyoka omuulikwa taya hogolola ta ka lela.
Shaama natango okwa tseyitha kutya omasiku 26 gaNovomba otali kala esiku lyopashigwana moka Aanamibia ayehe mboka ya adha iipumbiwa, taya pewa ompito yokuhogolola.
“Momasiku 26 gaNovomba moka, kehe gumwe okwa pitikwa a hogolole. Oosenda mpoka tapu ka hogolelwa, otapu ka patuluka okuza 07h00 yongula sigo 21h00 uusiku,” ta ti ngaaka.
Ta popi ta ti, kape na nando omuntu gumwe ta ka pitikwa, a hogolole konima yowili ndjoka onkene oosenda otadhi ka pata mbala konima yowili ndjoka ya dhenga.