ONGWEDIVA- Omulumenhu weedula 28 ota holoka nena momhangu yamengestalata waShakati konima a kwatwa po shaashi a hangika nepangwe te li va kele omunadolongo.

Oshiningwanima osha ningwa mexuliloshivike poshitaashi shopolifi mOngwediva efimbo lomatango.

Omukulunhu koshikondo shokukonakona oimbuluma moshitukulwa shaShana omupedu komufala Fredrik Ndjadila okwa kolelaka oshiningwanima eshi.

Opolifi oya hokolola tai omufekelwa ou okwa ya koshitaashi shopolifi nelalakano lokutalela po omupambele waye oo e li mokakuma.

Otaku hokololwa kutya eshi opolifi ya ningila omalumenhu ou omapekapeko okwa hangi ka nepangwe yoCannabis osho oyo omakaya 40.

Ota pangulilwa oshibofa shokukala nomapangwe pamukalo woumbudi.

Okwa didilikwa oshiwana shi hole okutwalela omapangwe ovanadolongo unene tuu kooitaashi yopolifi ngeenge tava ka talela po ovapambele wavo.

Omwedi wa dja ko koshitaashi shopolifi mOshakati, okwa lopotwa omukainhu weedula 23 a kwatwa po eshi naye a hangika ta twalele omunadolongo omapangwe. Omukainhu ou vati okwa hangika a holoka omapangwe pokati koshifima osho okwa li twalele omupambele waye.

Opolifi oya kumaida oshiwana opo shi xulife po okutwelela ovanadolongo omapangwe molwashi osha nyika oshiponga komunadolongo ngeenge ta nwile omapangwe mokakuma.

– fhamalwa@nepc.com.na