EPEMBES – Ministers, ǁGau!nâs, ǀAsa ǂâiǀgauna ǂgâxa-ūs, ǂKhamkhoesib, ǂGamǂgamsenǀhurun, ǂNuwiǁkhāsib tsî !Hao!nāsi ǂŪsigu dis, Sanet Steenkamps ge 20 ǀasa ǁkhāǁkhā!nā-omdi tsî sâi!nâ!nā-oms tsîna koro skolgu Ohangwena ǀkharib diga ǂoa ge wekheb di Donertaxtsēs ai ge ǁkhaeǁnâ. 

Nē ǁkhāǁkhā!nā-omdi tsî sâu!nâ!nā-omdi ǁkhāsib ge N$8 miljunsa !khōǂgā hâ. 

Nē N$8 miljuns projeks Ohangwenab dis ge ǀaweǁguisa !hū!nāsi dītsâdi hîa ǁgau!nâs !nâ a ǂhâbasa xūna khoraǂuis, ǀoa!nāhâ ǁkhāǁkhā!nā-omde ǀariǂuis tsî ǁnās ǀkha hoa ǁkhāǁkhāsenaon nî sâsa ǁkhāǁkhāsens ǂnamipeb !nâ tsî ǂgaoǀkhāsa !harib ai hâ ǁgau!nâsa hōsa ǁawoǁawos tsîna. 

Haka ǁkhāǁkhā!nā-omdes ge Shakela Shimbwa Junior ǂAm Skoli tawa gere ǁkhaeǁnâ soab ais ge Steenkampsa ge mî, ǂhanub noxopa ǁîb mîs ai mā tsî ǂâuǀoahâ ǁgau!nâsa ra ǁawoǁawo !khaisa. 

Ministers ge ǂhanub ǁîb di ǁguiǂams, îb !oabade !garo!ā ǀhûhâsigu tawa sī-ūs disa ra ǁgūba !khaisa gere ǀgonǀgon!gao, ǁnāpas ge ǁkhāǁkhā!nā-omde ǂhanusise Shakela Shimbwa Junior ǂAm Skoli, Ohamalila ǂAm Skoli, Mateus Nakatumbe ǂAm Skoli,, Ohaamala ǂAm Skoli, tsî Festus Ikanda ǂAm Skoli tawa gere ǁkhaeǁnâ soab !nâ. 

“Nē skolgu ge nēsi !Gaoǁguis ǁgau!nâsa xu Xrat 2 tamas ka i o Xrat 3 kōse ūhâ, 474 ǁkhāǁkhāsenaon, 17 ǁgau!nâ-aon tsî 5 sîsenaon tsîna ǀhaob ai !khōǂgā hâse,” tis ge ministersa ge mî. 

Skolǂgâs di tsoatsoas kurigu kaise a ǂhâǂhâsa tsî ǁnā-amaga !norasa tsî a sâsa ǂnamipeb !nâ nî !gûǁnâ tsî ǁkhāti hoana !khōǂgā hâse !khaisas ge gere ǀgonǀgon!gao. 

Ministers ge ǁgau!nâ-aon hîa !garo!ā !âgu !nâ nēti ī !ereamsa tani hâna gangansa gere mā, ǁguiǂgāsen tsîn ǀnî ǁaega ǂâuǀoa tama hâ ǁgau!nâs !aroma mâsigu !naka ǁîn ǁguiǂamsa ra dīǀoaǀoa !khais !aroma. ǁÎs ge ǁgûn tsî mâbaǁgûna gere ǂgan, ǁgau!nâ-aona !gôasiba mā, ǁgau tsî ǁîn kha !khōǁôagusa, ǁkhāǁkhāsenaon di !gâi!gâb kōse. 

!Nakaǂnôa ǁgau!nâs direkters, Ohangwena ǀkharib !nâs, Palisha Ngulus ge ministersa ge mîba, “Sida ge ǂauna skolgu !nâ ǁkhāǁkhā!nā-omn ǀorosib ǀkha ǂnôa. 

Xawe da ge ǂhanuba ai!gûgaru ǀarosens ǀasa ǁkhāǁkhā!nā-omdi dis tsî daoga !gâi!gâi!nâdi !aroma gangansa ra mā. 

“!Nāsa skolgu ge Ohangwenab !nâ nēsi !nanǀgaiba ūhâ,” tis ge ge ǀaro. Shakela Shimbwa Junior ǂAm Skoli ge 2024ǁî kurib ai ǀasa ǁkhāǁkhā!nā-omde ge hō, xawe nēs ai!â ǁgûn ge aitsama kurumâi hâ i !khaigu !nâ gere ǁkhāǁkhāhe. 

Nē skoli hîa Ombaba !garo!ās, Epembe ǁhûi!nâǂharis Ohangwena ǀkharib dis !nâ mâb 93 ǁkhāǁkhāsenaon tsî !nona ǁgau!nâ-aon tsîna ūhâ.