Taimi Haihambo 

Minista wouhaku Dr Esperance Luvindao, okwa patululila ovakalimo vomoshitukulwa shaHangwena, vokomikunda Onanghulo oshoyo Onamukulo oukilinika, oshivike sha dja ko. 

Pefimbo lepatululo loukilinika ava, Luvindao okwa ti nonande omikunda edi da ninga efimbo dihe na oukilinika, oda kala nokumona omakwafo koipapngelo yakula yopopepi ngaashi oshipangelo shEngela, osho yo Eenhana. 

Luvindao okwa ti oshitukulwa shaHangwena oshi na oipangelo i li 38. Vati itatu yomuyo oyeyi yakula i na eembete, noukilinika ve li 35. 

“Keshe Omunamibia oku na oufemba wokukala a pewa ekwafo louhaku u li pondodo i li nawa, kutya nee oku li komikunda ile modoolopa,” ta ti. Okwatwikila kutya oukilinika ove na oikwafifohongo ya wana po. Vati ovanaudu ova manguluka yo okuningilwa omakoonakono omikifi da yooloka ngaaashi TB, HIV/ AIDS naikwao ya wedwa po. 

Luvindao okwa yelifa kutya oukilinika ngaashi aka kokOnanghulo ohaka yakula omwaalu wovanhu va fika po 8,500. 

Natalia Hamutenya omukalimo womOnanghulo okwa ti epatulululo lokakilinika kavo komoNanghulo etumba linene shaashi ova ninga efimbo hava ende oinano ile va ka konge ekwafo koipangelo yopopepi. 

“Efimbo limwe omunhu oho ende oinano ile, nande owa ditika, ashike shaashi ku na nghee omunhu oho lihange ashike to delinge oinano oyo” ta ti. 

Eliud Paulus omukalimo wokOnamukulo okwa ti vo okwa li nokuli va sholola kutya pamwe okakilikika kavo itaka patuluka vali. “Ohaluka tu udite taku tiwa minista ote ya okunangeka okakilinika ketu, ndee ehafo linene omunhu ku wete ashike naapa to kwata,” ta ti. 

-taimihaihambo2000@ gmail.com