ONGWEDIVA – Aanona monooli nuumvo otaya ka dhana Okili kuyele sho taya ka etelwa oshiindingili shedhina 065 Kiddies Festival oshikando oshitiyali.
Omukokoli gwo-065 Kiddies Festival Martha Niilonga okwe ya po nedhiladhilo lyokugongaleka aanona monooli sho te ya etele ayihe taya pumbwa okunyanyukilwa pamwe omanga omasiku gOkili inaaga thika.
Aanongononi oya nyola kutya okudhana kwaanona oku na mo sha muundjolowele womadhilandhilo gawo, onkene osha pumbiwa noshasimana uuna aanona taya nyanyukile pamwe.
Omayinyanyudho taga ithanwa “065 Kiddies Festival” otaga ka ningwa okuza momasiku 06 sigo 07 gaDesemba nuumvo. Niilonga okwa ti, otaga ka ningilwa mehala lya patuluka lya taalelathana no-CTM mOngwediva, okuza potundi 08h00 sigo kwa toka. “Aanona otaya ka futa N$15, naakuluntu N$20 pomweelo,” ta popi ngaaka.
Ta popi kutya omasiku ngoka gaali otaga ka kala gu udha enyanyu oshoka otaga ka kala ge na iinyangadhalwa ayihe ya opalela aanona, iikulya iikunwa oongalo dhopashinanena niikwawo oyindji yi holike kaanona. Niilonga ota hiya aavali ya fale aanona omasiku ngoka opo ya ka nyanyukilwe pamwe.
“Onde ya po nedhiladhilo ndika oshoka onda ndhindhilike kutya aanona oya kolota ohole pamwe naakuluntu yawo, olundji aakuluntu ohaya yi nookuume kawo taya thigi po aanona, onkene onda mono sha wapa okulongekidha omasiku ngoka aakuluntu ya ka uuvithe aanona yawo ohole,” ta fatulula ngaaka.
Ta gwedha po kutya shoka hashi gandja oompito dha fa ndhoka ongaashi omauliko giipindi ngoka haga holoka ashike iikando iishona, ihe ihaga gandja omahala ga andjuka nawa kaanona ya kale pamwe naavali yawo.
Niilonga okwa indile wo oshigwana, kwaangoka ta vulu esiku ndyoka a etelele uukwathithi waakiintu, nando kamwe ashike, iikutu noongaku oonkulu osho wo kehe shoka shi li po, opo yi ka gandjwe kwaamboka ye li mompumbwe.
“Oshoka onda itaala mokushuna moshigwana, shoka tandi ka mona po otandi ka kwathela osikola yi na uunona ye na uulema,” ta uvaneke ngaaka.
Okwa ti, omasiku ngoka hago gokukala inaaga longithwa unene kaanona, omanga taya adhika ye li mefudho lyosikola.
-vkaapanda@nepc.com.na