Auleria Wakudumo 

Omunashipundi woliha yomafamba moshitukulwa shaHangwena Elia Vilho okwa holola kutya oliha yokomudo 2025/2026 otai ka hovela mEtitano kokapale komaudano mEenhana. Vilho okwa ti okatanga otaka ka tameka ongula po08h00. 

Etanga loomeme lokeemhadi mOhangwena oli li koshi yoNamibia Football Association (NFA). 

Omunashipundi okwa ti, etanga loomeme ole ya pefimbo la wapala, efimbo ovakainhu ihava tulwa momashongo mahapu molwetanga.

Okwa ti monale, oudano owa li wa talika ko ongoudano wootate ashike novakainhu ova li inava pitikwa okudana etanga lokeemhadi. 

“Ovadani ohava kala yo ve na ounyengwi kutya otava ulike oitalendi yavo peni molwaashi oikwafifo inai wana, oifokundaneki itai lopota kombinga yetanga lokeemhadi. Otwe lineekela olixa eyi otai ka yandja omhito iwa komafamba opo a ulike oitalendi yao,” Vilho ta ti ngaho. Vilho okwa indila ovakwashiwana vomEenhana nomikunda dopoushiinda, novakufimbinga aveshe opo ve uye va yambidide omafamba metanga. “Eholokepo leni amushe otali ka twa oukadona omukumo opo va dane nelitulemo nokushikula omaifano avo nokulundulula eitavelo letanga moshiwana,” Vilho ta ti ngaho. 

Olixa ota i ka danwa iyo omuJuli womudo tauya. Eengudu detanga otadi ka kondjifafana moshitukulwa opo mu ka dje ongudu imwe oyo tai ka kalela po oshitukulwa shaHangwena koNational Women’s Football tournament.

Momafiku 15 Desemba 2025, omakondobolo otaa ka lya ehete pokati keetima tadi shikula: 

08:00: Nam Nam FC vs Northern Pillars FC

09:20: North Princess Shield FC vs Galz & Goals FC

10:40: Moving Power FC vs Bright Stars United FC

12:00: Mwadinomho United Queens IC vs Green Side Queens FC

16 Desemba 2025

08:00: Galz & Goals FC vs Nam Nam FC.

09:20: Mwadinomho United Queens IC vs Moving Power FC.

10:40: Bright Stars United FC vs Green Side Queens FC.

12:00: Northern Pillars FC vs Nam Nam FC.

14:40: North Princess Shield FC vs Mwadinomho United Queens IC.

-wakudumoauleria@gmail.com