KATIMA MULILO – Bayemeli babanca bane baketilwe kulatelela liketisa za milonga ni milonganyana mwa sikiliti sa Zambezi, neba konkiselizwe mwa litulo za bona Labutanu. Bayemeli ba katengo ka sikiliti balobapeli nebakile ba konkisezwa kaufela. Bernard Sisamu ili muyemeli wa silalanda sa Kabbe ya Mutulo naketilwe kuba muinasipula wa katengo ka kamaiso ya sikiliti. 

Ukasebeza mwa katengo ni Matengu Nkando wa sillanda sa Sibbinda ni Vincent Sinalumbu wa silalanda sa Judea Lyaboloma. Bane baketilwe kuyo yemela sikiliti kwa Ndu ya Milao ya bubeli ki Raymond Sezuni wa silalanda sa Kabbe ya Mbowela, Kennedy Simasiku wa silalanda sa Katima ya Tolopo, ni Progress Sipapela wa silalanda sa Linyanti. Denis Mukena wa silalanda sa Katima ya Matakanyani ni Bennety Busihu Muipapati ya Ikemezi ikaba limembala feela.

Hala bayemeli bakatengo katolopo Kabende Kabende kuzwelela kopano ya Swapo naketilwe kuba meya, uka bakwelwa ki Charity Mabuku-Matongo ni yena kuzwelela kopano ya Swapo. Muinasipula wa katengo ka kamaiso ikaba Nsala Muhongo, mi ukasebeza ni Royd Likando ni Kamwi Mazila kaufela ki limembala za Swapo.

Jimmy Sikwela wa kopano ya IPC ni Simasiku Mukendwa wa kopano ya NDP ikaba limembala feela. Mwa manzwi ahae amano konkisezwa kuba meya wa tolopo ya Katima Mulilo, Kabende Kabende naitamile kuli uka beleka ka kuikokobeza kono inge ‘alabela kwa litokwahalo za sicaba ka ku ankufa. 

“Lukala likepe le li nca mwa Katima Mulilo. Likepe le lika tolokiwa ki kutaleleza lisebelezo za sicaba, buikalabelo ni swalisano. Luka ndongwama lika za butokwa kwa sicaba sa luna, kuaba mubu kaswanelo kusina silibonda, mikwakwa sakata, mezi akenile, kusebeza kaswanelo ni katengo ka ka teleza ni ku alaba,” nekubulezi Kabende.