Auleria Wakudumo
Odoolopa yaNdangwa, Ongwediva, Oshikuku, Outapi nOniipa oya hoolola oomayola vedoolopa ovakainhu va pingafana po oomayola vovalumenhu ovo vali nale koipundi.
Elelo lodoolopa yaNdangwa ola hoolola Ester Auala oye a ninge mayola wodoolopa. Auala okwa kufa oo ali nale mayola wodoolopa, Paavo Amwele koshipundi.
Auala ota kwafelwa komupedu mayola waye Nikodemus Amadhila, omunashipundi wokakomitiye kelelo lodoolopa Nehemia Angula oshoyo oilyo yomutumba yelelo Emistor Mukendwa opamwe naElizabeth Netope. Elelo lodoolopa yaNdangwa otali ka kwatelwa yoo komesho koilyo ivali, Alfeus Hauwanga naAngelina Immanuel.
Odoolopa yaNgwediva nayo oya tula kofola omukainhu oye a ninga mayola wodoolopa. Naemi Amuthenu oye a ninga mayola wodoolopa yaNgwediva, a kufa Taarah Shalyefu koshipundi shoumayola.
Amuthenu ota kwafelwa moilonga yaye komupedu waye, Jeremia Amutenya, omunashipundi wokakomitiye kelelo lodoolopa Juliana Haimbodi, oilyo yomutumba welelo ivali, Priskila Hailulu na Jason Mwalengwa oshoyo oilyo yookansela velelo ivali Frondina Kemanya naJona Helao.
Odoolopa yaUtapi nayo oya hoolola mayola womukainhu. Victorina Neingo oye mayola wodoolopa yaUtapi, yee oye omunashipundi welelo. Matheus Endjala oye omupedu wamayola omanga Gerson Dumeni oye omunashipundi shokakomitiye kelelo lodoolopa. Benyamin Endjala naMaria Auwela ovo oilyo wokakomitiye kelelo omanga Shiweva Ishitile naSara Peelenga veli oilyo melelo lodoolopa.
Omanga odoolopa yaNiipa nayo ya hoolola Jacobina Shipanga oye a ninge mayola wodoolopa yaNiipa. Shipanga ota kwafwa kuVilho Kalutenda oo a ninga omupedu mayola wodoolopa oshoyo Frieda Uukunde oo a ninga omunashipundi shokakomitiye kelelo lodoolopa omanga David Kambonde naSaara David va ninga oilyo yokakomitiye kelelo lodoolopa naElizabeth Nambahu pamwe naFrieda Emvula va ninga oilyo yelelo lodoolopa.
Odoolopa yaShikuku nayo oya hoolulula mayola mukulu, Elizabeth Endjambi oye a lele odoolopa yaShikuku. Endjambi ota kwafelwa kuCecilia Kamati onga omupedu waye naLinus Mingeli onga omunashipundi wokakomitiye kelelo lodoolopa oshoyo oilyo yokakomitiye Helmut Uusiku na Victoria Shalumbu oshoyo Petrus Nambinga onga oshilyo shelelo.
Pefimbo ta yi koshipundi, mayola wodoolopa yaNdangwa Ester Auala okwa udaneka kutya otaka lela oshiwana shaNdangwa nefimaneko, nota ka kwashilipaleka kutya okwa tula oshiwana komesho moinima aishe.