Elelodoolopa laShakati ola longa shomupondo Olomakaya, konima eshi la lundulula ovakalimo vomolukanda laShoopala mOshakati opo va tembulilwe keenhele dipe edi ihadi talama omeva. 

Olukanda eli ola ninga ondobe yomeva paife, nodula ei ya loka oshivike sha dja ko oya fiya omaumbo avahapu koshi yomeva nale. Vamwe eebashu davo oda teyulwa po komhepo yodula, omanga vamwe omaumbo avo e li ashike mokati komeva, omo noinima yavo ya tekauka, nokunyonauka komeva. 

Ovakalimo ava vahapu ova tembulilwa kolukanda laNawa, olo la ninga efiku tali longwa kelelodoolopa, li tulwe pamufika u li nawa, itau talama omeva. 

Mar ia Makata omunambel e lwa womelelodoolopa oo e na oshinakuwanifa shokutembula nokukwatela omalukalwa aa komesho okwa ti elelodoolopa ola li la unganeka oihauto osho yo omaloli a tute ovanhu okudja kOshoopala Olomakaya. 

“Elelodoolopa natango ola li la fya oshisho shokuulikila ovakalimo eepolota davo dipe, osho yo okudengela omalukalwa avo,” Mataka ta hokolola. 

Simeon Joseph oo omukalimo umwe womwaava va li tava tutwa Olomakaya okwa ti okwa pandula elelodoolopa eshi le litetuka diva, shaashi efundja ola eta ko omayulu lela. 

Selma Enkono oo naye naye a pewa opolota okwa ti okwa pandula neenghono shaashi ka li e na onhele yaye kuye vene. 

“Oshili onda pandula elelodoolopa laShakati shaashi ola longela nge oilonga yomupondo. Ngaashi paife itandi futu vali eenhele dokuhiila,” ta ti. 

Odula ei oyo ititatu elelodoolopa tali tungile ovakalimo omalukwa, nohaa kala ashike a nuninwa ovakalimo ava hava kala ve na omaumbo e li meenhele hadi talama omeva. Ovakalimo ava natango ova pewa olusheno loshali, osho yo oundjuwo. 

-taimihaihambo2000@gmail.com