Opolisi moshitopolwa shaShana oya kumagidha oshigwana shi tule po okuhinga kaashi na omikanda dhokuhinga yo yaahinge ye li kohi yiikolitha. 

Opatolola oyi li metifa moshitopolwa shaShana, notayi ka longa naamboka itaaya gwanitha po omilandu dha tulwa po. 

Omukuluntu gwopolisi moshitopolwa shaShana Naftal Lungameni okwa ti okuhinga waa na omukanda okwa nika oshiponga nohaku tula aantu muupyakadhi osho wo moshiponga. 

“Hulithii po okuhinga kopate, kaamu na omikanda dhokuhinga. Oshinima shoka osha nika oshiponga, unene ngele pwa holoka oshiponga,” ta kumagidha ngaaka. 

Ta ti, ngele ku na omukanda otashi ti ino hinga. Omukanda ogo hagu pitha omuntu epitikilo lyokuhinga. Lungameni okwa kumagidha ngaaka unene pethimbo ndika lyoondjila dhu udha aahingi ya za kiitopolwa yi ili noyi ili, onkene otashi pula omuntu a kale eshi okuhinga. 

Opolisi oya kumagidha, aahingi kaaya hingilile, yo kaaya hinge ye li kohi yomalovu nenge ya vulwa. 

Tayi ti, okuhingilila itaku ti okuthika. 

“Nonando oto hingi kashona owu na okuthikaashike, omolwegamenolyoomwenyo mwa humbata mohauto osho wo dhayakweni ye li wo moondjila,” tayi kumagidha ngaaka. Ya gwedha po kutya, ngele oshigwana osha landula oompango adhihe dha tulwa po, nena kape na nando uuwinayi washa tau holoka. 

Iiwike iyali ya piti, aantu oyendji oya kanitha oomwenyo, ihe iiponga oyindji oya holoka kokwaalandula omandhindhiliko gomoondjila omanga yamwe taya hingi manga ye li kohi yiikolitha. 

Opolisi yaNamibia okupitila miikundaneki ya yooloka oya kumagidha wo aahingi yiihauto, ya hinge nuukeka osho wo okugwanitha po oompango dhomoopate. 

-vkaapanda@nepc.com.na