Nandarire kokutja ombungurwaveta yehi ya kongorerere ombongarero oitjavari yehi yo 2018, muyo kamu na ozongutiro zehi zombongarero ndji.
Ombara Otjitambi yOvaherero, Hoze Riruako, ma tja. Tja raisire oumune we ohunga nOmbungurwaveta yehi oyo nai ndjiri motjihungiriro mombongarero yotjiwaṋa. Na tja tjimwe tjaimbi mbya za mombongarero yo 2018 yehi ehi rotjizeero nu mombungurwaveta, oveta ndji hi nokutjiukwa kutja tjii oveta ndji mai rihungamisa pi. Ku ku he ri nao uriri nungwari wina pu i hi na pemwe mai tamuna poo okuhungirira kehi rotjizeero.
Ombara Riruako ma tja, nganda Onamibia aya kutuka indji oondarero nondumbiro yohoromende ya Namibia yehi pu pe hi na imwe mozondando zayo poo momihunga vyayo ina pu i sora motjiṋa tjehi. Okuza komahandurisiro, ozoheketara o-20 ngandu komuano mbwi womurande omupupurukwe nomurandise wina omupupurukwe tjimwe tjavyo tji tji hi na ngamba tja kotora ehi koveni varo nu mberi pandjara otjovandu mberi yekwa.
Riruako ma tja ngunda nai mombongarero yotjiwaṋa a penotjihungiriro ohunga nombungurwaveta yehi ndji, imba muyo mbu mave rihungirire, mberi ouṋepo wombongarero ndji kave na inga omahakayeneno nomatyasaneno na imba mberi popezu novandu vehi ndi mari hungirirwa, mberi ovanane vombazu tjimuna eye mbe tjevera omahi wakangamwa novandu mbe turira nokuhupira muwo.
Eye wina ngu ma tja ohoromende i hendeka nandarire momananeno wawo ku i ha yandja ombango. Pendje nokuyandja kombango ngu ya tanda tjinga nai omahi wakangamwa ongwi i hungama okukondjisa okuyetwa mongomi, oyo ngeri ouṱiṱi keke uriri kounene wawo ape ozoperesende hambombari uriri wehi arihe mOnamibia.
Ngunda ehi enyingi ndiri ape ozoperesende o-80 ndiri ouini wovandu kuwo oveni, nu tjinene Ovavapa nu mbari ovahuure, oveni vawo ave ritupukira muro nokuhina oveta na imwe i ve tjayera kangamwa tji mave vanga okutjita muro. Ohoromende tji itjita ohunga nomahi nga ayeri okunana mo okamariva kotjitjamurongo porwe.
Tjikweya komahi wakangamwa ovanane vombazu porwe mu mave ngara ve nousa owo mburi ousa nai ohoromende mbu ya tanda okuveyeka noveta ombungurwa yehi. Nandarire oyo nai ngeri omahi nge hi nonḓengu kaparukaze onḓengu yawo ndjiri imbi omundu mbya tungu muro nokuhina okutara kozonḓengu zarwe tjimuna ozongungu zovaṱi novakuru mba suvisiwa muwo.