KATIMA MULILO – Mubakweli likwambuyu wa njimo Ruth Masake ususuelize babanca kuitenga mwalitaba za lipisinisi ni bueteleli mwa kuhulisa sifumu mwanaha Namibia. Hana bulela kwa Mukopanowa wa Pili wa Kuikambota wa Babanca mwa sikiliti sa Zambezi Labubeli, Masake naize kakutalima mulelo wabusilela wanaha wa zwelopili (NDP6), njimo, bundui, ni limbule za Nyambe lingiwa kuba za butokwa mwa kutahisa misebezi, kubateni kwa lico, nikuhulisa kulekisa kwanda naha.

“Pono ya mubuso ki kutahisa kuli njimo ni bundui likone kuhoha maikuto abatu, libe zetisa kekezo ni kuba bukamuso mo baitenga babanca,” nabulezi. Mubakweli likwambuyu naize babanca mwa sikiliti sa Zambezi bana ni litohonolo mi bamwa mayemo akukona kukasha cinceho bakeñisa kosifumaneha sikiliti. Nazibahalize sikiliti kakusaba sesi ipatile kono kakuba nzila ya kuzwela ya butokwa.

“Sikiliti se sina ni mezi, mubu onunile, linuka mokuna ni litapi, ngungahanyio ya litaba za bupoti ni misika hala linaha zeli mabapa,” nabulezi, mi naekelize kuli mubuso ubata kubona babanca mwa sikiliti habafitela kwapili mwa kulima lico, litapi, ni limunanu. Nasusuelize bane bali kwamukopano kuba ni kabelo mwa masheleñi anaha asulezwi kutusa lipisinisi za babanca, ili taba yana ize kiya butokwa hala kutusa mapurojekiti azamaiswa kibabanca.

Kuekeza fo na elelize babanca kusebelisa lituso zefiwa kipanka ya Zwelopili mwa Namibia kuli bakone kuitenga mwa lipisinisi zetuna. Masake natolokile kuli mubuso uzwelapili kuikambota ni panka ya Agribank kumbweshafaza lituso zateni za masheleñi. Naize njimo, bundui ni cafanzo ya mubu liswanela kuba lisebeliso zabutokwa mwa bukamuso bwa kuhulisa naha. -Nampa