KATIMA MULILO – Mapokola mwa sikiliti sa Zambezi bakalile patisiso hala lifu la muyahi wanaha Zambia, yo situpu sa hae nesi fumanwi mwanukana mwa silalo sa Ikaba Labulalu kakusasa.

Kakuya kapiho ya mapokola, situpu sa Chipango Iseke, muuna ya simuluha mwanaha Zambia yo lilimo za hae halisika lemuhiwa, nesi fanwi kanako ya 08h00 la 14 Sope ki mulisana wa likomu kwa nukana ya Simwambo, mabapa ni munzi wa Sichombe. Lipatisiso za makalelo libonisa kuli nyandi nasiile munzi wa Munsu Lamubulo la 12 Sope, ili kwana beleka kuliba kwa munzi wa Sichombe kono nasika yo kuta. Limembala za sipokola kuzwelela kwa Luhononno, nebakile baliba kwasibaka sa kezahalelo, situpu sa hae nesikile sa tatubiwa mi nekulemuhilwe kuli nesina ni likolofalo zebonahala kuli neli tisizwe ki kwena. Taba nekwaluzwi kwa siteshini sa mapokola sa Ngoma. Situpu nesi isizwe kwa libulukelo la Katima Mulilo kuyo pazulwa kuli sene sitisize lifu siyo nyatelwa. Bahabo nyandi neba lemusizwe. Lipatisiso za mapokola lizwelapili.