Roberto McNab, omunamido omi-38 okwa pewa ehandukilo lomwenyo mekwatafano ledipao lomukulukadi waye, oo vati a dipaa mo 2024.
McNab vati okwa dipaa Dapeua Helen Onesmus (43), mo 14 Febuluali 2024, peumbo lavo poRocky Crest moWindhoek. Eshi vati okwe shi ninga pefimbo a li e mu teelela mongalashe yeumbo lavo pefimbo lokomatango.
Onesmus vati eshi a fika meumbo okwa ya ashike a yukulila mongalashe, ashike ka li e shi ngeenge McNab omo e li shaashi omwa li mwa laula. Konima vati okwa kufa ombele nonghonda ndele te mu tu oikando i li omi-27 vati.
McNab eshi a mana oikumwifalonga yaye, vati okwa kendabala okukufa ombele ndele te likutula momunhino, nelalakano loku likufa omwenyo, ashike okwa xupa nokwa ka taalele oidjemo yoilonga yaye.
Umwe womovashiinda, oo a li a ka yandja oumbangi waye vati woshiningwanima komhangu, okwa hokolola ta ti efiku loshiningwanima ova uda ondaka tai di meumbo lavo tai ti ombili efenge, nokonima ohaluka vati mwa mwena.
Omuyandji woumbangi okwa hokolola kutya kava li tava dulu okuya meni leumbo shaashi ola li la patwa, wo nomuvelo wongalashe nao owa li wa patwa.
McNab naOnesumus vati ova li va hokana mu 1 Juli, nokava li ve na okaana komohombo. Ashike nande Onesmus okwa li e na keedula o 14, oko vati a dja nako mohombo yaye ikulu, noka hangika meumbo pefimbo loshiningwanima.
