Auleria Wakudumo
Ounona 31 500 moitukulwa Oshana, Omusati, Ohangwena, Kavango East, Kavango West, Kunene, Khomas, Hardap Otjozondjupa, no//Kharas otava ka pewa omaano eenghaku dofikola koproyeka hai ifanwa ‘Never Walk Alone’ oule weedula nhatu.
Oproyeka oya pitifa momukanda kutya ounona ovo vahapu ve li ovanafikola otava ka pewa eenghaku edi omalufo, tashi ningwa oule weedula nhatu da taalelwa.
Eenghaku odi li pongushu yoshimaliwa sheemiliona N$12,9.
Neudo, oproyeka otai ka yandja eenghaku 10 000 koitukulwa ngaashi Oshana, Omusati, Otjozondjupa noKharas omo keshe oshitukulwa tashi mono ekwafo leenghaku dofikola di li 2 500.
Oproyeka otai twikile mo2027 nokukwafa ounona.
Otai ka yambidida ovahongwa 11 5000 okudja koitukulwa Ohangwena, Kavango East, Kavango West noKunene.
Keshe oshitukulwa otashi ka pewa omapando eenghaku a fika po2 500 ka kele koshitukulwa shaKavango East osho tashi ka pewa omapando e fike po 4 000.
“Oshitukulwa shaKavango otashi pewa omapando eenghaku mahapu molwaashi osho oshitukulwa shimwe osho shina ounona vahapu vehena eenghaku dofikola.
Omwaalu wounona ovo vehena eenghaku moshitukulwa omo oha hanga po 14 000,” oproyeka tai holola ngaho.
Oproyekao tai twikile yoo vali mo2028. Momudo oo, otai ka kwafela natango ounona 10 000 okudja moshitukulwa shaHangwena, Khomas, Kavango East oshoyo Hardap.
Oproyeka oya holola yoo kutya oshitukulwa shaHangwena otashi pewa olweefo litivali shaashi osho oshitukulwa shitivali shina omwaalu wovahongwa vahapu ovo vehena eenghaku dofikola ile hava yi kofikola eemhadi kombada.
Never Walk Alone oya kwafela ounona 12 750 moshitukulwa shaHardap omo ya kwafela ovahongwa 970, moshitukulwa shaMaheke oya kwafa ounona 1 291, omanga moKhomas ya djaleka ovanafikola 1 853, Kunene oveli 1 823, Ohangwena oveli 1 000 noshitukulwa shaZambezi oya yambidida ounona nomapando 2 200 eenghaku.
Molopota yavo, oproyeka oya holola kutya oishi shi kutya ounona vofikola vahapu oveli momhumbwe yeenghaku dofikola.
Omhumbwe yeenghaku ohai dulu okuya ehongo lovahongwa moshipala.
Vahapu ohava kanifa ehalo lokuya kofikola molwaashi kave na omudjalo weli xwapo. Eshi ohashi dulu okudopeka omuhongwa ile a kale ena oitwa noidjemo ya shuna pedu.
Oproyeka nonande Taishi endifa nawa, natango otai pula ekwafo moshiwana opo i ye oukuni kumwe navo voo va dule okudjaleka ovanafikola moNamibia.
Onghene ohatu indile oikondo yopaumwene noyepangelo ya yooloka opo itu waimine molweendo eli.
Ohatu indile ekwafo unene okudja moikondo oyo hai ungaunga neeshi oshoyo eemina oyo imwe inai tu kwafa fiyo okeluwa eli opo i tu kwafe.
-awakudumo@nepc.com.na
