Epangelo laNamibia natango ola dimbuluka omaumbo a fika po 12, okudilila moikandjohoololo ili meni loshitukulwa noikwafifo yokutunga. 

Oikwafifo ei oya kwatela mo eepaala, oipeleki, eemboxa, eesamende, omivelo osho yo eelama domivelo, eelama domakende nomakende osho yo omamanya okaungulita. 

Ngoloneya woshitulwa shaMusati Immanuel Shikongo okwa ti eshi natango otashi ulike elitulemo osho yo ekwafo lepangelo ngeenge tashi ya pokuyambidida ovakwashiwana neemhumbwe da yooloka. 

Shikongo okwa twikila kutya natango omikunda dimwe meni loshitukulwa ngaashi omukunda wedina Olyonime owa ninga efimbo uhe na omeva. 

Ovanhu ova kala hava xupu shokadila, vo tava nane noudjuu ngeenge tashi ya pokukonga omeva. 

“Vamwe nokuli ohava ende oinano ile oku ka konga apa pa fa pe na omeva a yela. Ashike paife ova pewa ominino domeva odo tadi va kwafa okuteta oinano ile hava ende ngeenge tava ka teka omeva. Ominhino mutu otadi ka kwata ngaho oinano yeekolomita nhatu fiyo nhee noda yandjwa di li 31 momwaalu. 

Uushona Timoteus oo e li mongudu yaava va dimbulukiwa kepangelo okwa ti, elao ohali monika ashike lumwe modula. 

“Oitungifi paife oya ninga ondilo neenghono. 

Kanda li nokuli nde shi teelela. Epangelo otali longo lela,” ta ti. 

Ye Venondubo Kapia okwa ti okwa pandula koipeleki yaye neenghono, nota ka fitika osho yo okudengela eumbo laye amanguluka paife. 

Ombelewa yaNgoloneya natango oya kwafa yo opoloyeka yeexuxwa meni loshitukulwa noikwafifo oyo ya pula ongushu yoN$ 15 344. 

-taimihaihambo2000@gmail.com