Minista wehongo, eenghulunghedi, ovanyasha nomaudano Sanet Steenkamp okwa kunghilila ovanhu ovo ve na oshinakuwanifa shokukuta ovahongi fikola opo va xulife po oulingilingi ngeenge tava kutu ovahongifikola. 

“Longifeni ouyuuki ngeenge tamu kutu ovahongifikola. Inandi hala okuuda ovanhu tava longifa oulingilingi,” ta ti. 

Okwa ti ovanhu tava longifa oulingilingi otava ka katukilwa onghatu yopaveta. 

Minista edi okwe di popya Etitatu pefimbo kwa li ta yandje oshipopiwa shaye shomudo 2026 nelalakano lokukumaida ovanailonga eshi va tameka oilonga. 

Ovanailonga va dja mouministeli wehongo okudilila koikondo ya yooloka okwa li va fika komutumba ou opo va pwilikine eshi tava lombwelwa kuminista wavo. Minista okwa ti ombelewa yaye oya didilika ovanhu tava longifa oulingilingi ngeenge tava kutu ovahongifikola osho shi li sha puka. 

Ovo va popya naKundana onghela, ova hokolola tava ti ova pandula eshi minista a yandja ekunghililo eli shaashi paife oulingilingi ova ninga uuhapu ngeenge ovahongifikola tava kutwa. 

“Unene tuu monooli oungilingi wokukuta ovahongifikola otau dana onghandangala yakula. Naame ondi li handi kongo oilonga nonda kala paife eedula nhee inandi mona oilonga youlongifikola ashike nande nandi ye komapulapulo ihandi di mo,” ta ti. 

Natango umwe naye e lihongela oulongifikola okwa hokolola ta ti ovanhu vamwe paife ohava futwa mo oshimaliwa opo va tule po omunhu wonhumba popoosa yokulonga ofikola. 

“Ngeenge hatu i komapulapulo omunhu ou ta di mo oha kala nale e shivike shaashi okwa endelwa po nawa kovanhu ovo ve kwetele omapulapulo oilonga komesho,” ta ti. Natango umwe okwa weda po ta ti ovanhu vamwe ngeenge tava i komapulapulo ohava kala nale va pewa omapulo oo taa ka pulwa. 

Minista okwa lombwela ovanailonga va dja mouministeli wehongo opo va yakule nawa oshiwana osho yo pauyuuki. 

“Eembelewa kadi shi deni dopaumwene ashike odepangelo. Omwa tulwa meembelewa opo mu yakule nawa oshiwana,” ta ti. Steenkamp okwa ti osha fimana opo ovanailonga va kale tave lihumbata nawa osho yo okuulika oshihopaenenwa shiwa ndele hakulonga oimbuluma. “Ouministeli wetu ou na outendo u na eemhango da pumbwa okulandulwa keshe komunailonga. Natu liufeni komilandu da tulwa po opo tuha ninge oihakanwa yokukufwa moilonga,” ta ti. 

-fhamalwa@nepc.com.na