RUNDUS – Katjinakatji Senior Sekondere Skoli hostels ǁkhāǁkhāsenaon hîa !garo!ās kliniks ǁga ǂoa ge wekheb di Mantaxtsēs ai ǀae!khōdi !aroma ge ǂgui !gôab !nâ sī hâ in, ǁnāpan ge ǂâisāhe rasa !oa ǀae kai ni ge ǂû-e a ǂûs khao!gân, ge nēsi ǂuruse hâ. ǁNān hîa ge ǀaeǁgâub !nâ ǁgoe kaihe hâ in tsîn ge ǁnāxūhe hâ. 

Kavangob Huriǂoas ǀAwemā!nans di mîgowaba-aob, Mathews Hamutenyab ge ǂoa ge wekheb di Denstaxtsēs ai ǂhaitsi ǂanǂansa nē mâsib ǂnamipe ge dī hâ i. “Hostels !nâ ra hâ ǀgôan ge Sontaxtsēkam !oeǂûs !nâ pere-i, poloni-i tsî oros-i tsîna ǂûs ase ge !khō!oa. 

Pere-i hîa ge ǀoro hâse ǀnî ǀgôan xa a !nurihe-i ge, Hamutenyab gere mîsa !oa, Fraitaxtsēs ai skoli tawa ge !naoǁnâhe tsî ǀoro-i asa ra ǁgau datomsa noxopa ge !kharu tama hâ i. “Mantaxtsēkam ǁgoagan ge ǁkhāǁkhāsenaona ǀnai ǁgoagas di 6h40 xu skoli beros tawa !gâisen tsâ tama !khaisa !nuri tsî kliniks ǁga īs di ǂganamsensa ge dītsoatsoa. ǀHaob ain ge 430 ǀgôana nē !uiǂûsa ge ǂû hâ i tsîn ge ǁnā !gôaba xu 113 kliniksa ge sari, tsûa!nāb tsî ǀnîna ǀkhûib tsîna !khōǂgā hâse,” tib ge ge mî. 

Nē !gôaba xun ge 28 Rundus ǂHanusi ǀAeǁgâuba !oa ge ǁnaeǁgauhe ai!â hâ ǀae!khōdi !aroma. ǁKhā tsēs di tsē!gâǁaeb ain ge ǀnai 25 ǀgôana ǀae!khōdi khao!gâ ge ǁnāxūhe. 

!Gau ge !nona ǀgôan ge noxopa ǀaeǁgâub !nâ ūǀgarahe tsî Denstaxtsēs ai gere ǁnāxūhese. “ǀAedī-aona xu ge ǂoaxa ǀae!khōdi !nurigu ge ge ǁgau, ǀguis khami ī, !gā-i tamas ka i o ǀae kai ǁkhā a xū-i nē ǀgôan sorodi !nâ hōhe tama ge isa,” tib ge ge mî. ǀAwemā!nans ge ǁnāti ī ama-e ūhâ tama hâ !nurigu hîa skoli di ǁgam-i mâsib ge nē ge ī !nae!khaisa a !aroma, ti gere mîga ge ǂharaxū, ǁîgu ǂhanu tama xui-ao.”