OSHAKATI – Omunashipundi gongunduwiliki mehangano lyokupungula oshimaliwa shoopenzela dhaaniilonga lyedhina Government Institution Pension Fund (GIPF) Penda Ithindi, okwa totha mo kutya ongushu yoshimaliwa sho-GIPF oya koko noopelesenda omugoyi. 

Ndhoka okwe dhi thamuna ongula yEtine mOshakati, sho kwa li kwa pitithwa pambelwa olopota ndjoka ya ndjokonono omiyalu dhomapungulo goshimaliwa momukokomoko gomumvo 2024/25. 

“Sha ikolelela kolopota ndjika, ehangano olya longo nawa noonkondo sho oshimaliwa sha koko okuza poobilliona N$167  omumvo gwa yi, sigo oobiliona N$183 ngashiingeyi. Omwaalu ngoka otagu holola nkene eliko moshiketha shehangano tali nkondopala,” ta fatulula ngaaka. 

Ithindi okwa fatulula kutya ehangano ndika olyi lile po okufuta omauwanawa gaantu mboka ya kala nokupungula no-GIPF omanga  taya longo, uuna ya ka thiga po iilonga nenge ya thika momimvo dhoshipundi shevululuko. 

Ta ti, GIPF oha futu nduno sha ikwatelela nkene aaniilonga osho wo aagandji yiilonga ya kala nokupungula nehangano ndika, taku gwedhwa nduno iiyemo mbyoka GIPF ha mono momapungulilo,  mbyoka hayi indjipaleke opo yi vule okufuta omauwanawa ngoka niihohela. 

“Mongashiingeyi GIPF oku na oshimaliwa sha gwana, shi vulithe mpoka sha gwana okufuta omauwanawa giilyo ye. Osha simana aluhe ngele omahangano gokupungula ge na oshimaliwa  oshindji shi vule shoka shi na okufuta ashike iilyo yasho, ethimbo alihe,” Ithindi ta fatulula ngaaka. 

Ta yeleke kutya oshimaliwa sho- GIPF kashi li ashike moshako sha pungulwa, ihe ohashi yambidhidha omahangano nomandiki galwe momukalo gokugaluka niihohela, ta ti, ngoka ogo omukalo gokwiindjipaleka oshimaliwa shawo. 

Ithindi okwa ti, oye shi okutotha mo kutya pampango ya tulwa po ehangano lyomapungulilo olyi na okuyambidhidha keliko lyoshilongo shi thike poopelesenda 45 ngele oonshona, ihe GIPF okwa yambidhidha noopelesenta 51. 

“Onda hala wo okukumagidha iilyo yo-GIPF kutya oyi li mehangano lyi li nawa nolyi na oshimpwiyu niilyo yalyo, onkene lye ya po nomauwanawa taga yambidhidha nokulundulula oonkalo dhawo,” ta fatulula ngaaka. 

-vkaapanda@nepc.com.na