OSHAKATI- Iitopolwa yokoonoli otayi hiya aakokele miitopolwa Oshana, Ohangwena Omusati oshowo Oshikoto opo ya tameke okudhana etanga lyokoompadhi miitopolwa yawo.
Omunashipundi gomaudhano ngoka Ikolelela Ekandjo okwa ti, oliga ndyoka oyaa kokele yomimvo oku za 35 okuya moomvula dhopombanda.
“Omaudhano ngoka ohaga dhanwa ashike lumwe momwedhi, sho oosipana dha yooloka hadhi hangana nokudhana,” Ekandjo ta ti ngaaka.
Ta ti, ngaashingeyi oyena oosipana dhina aadhani yathika 400, ashike elalakano olyo ku indjipaleka omwaalu.
Ekandjo okwa ti, oyeya po noliga ndyoka nelalakano lyoku kandula po omandhilaandhilo taga vulu okunkundipaleka aakokele.
“Otwa ndhindhilike kutya aakokele oya taalela omaupyakandhi pamandhilandhilo, yamwe oye li mompumbwe yoshimaliwa, omahepeko momagumbo, eteyo ndjokana no yindji yindji, sho oshoka twa hala ya kale yiipyakidhila okudhima po oomandhilaandhilo gafa mpoka,” ta fatulula ngaaka.
Ta ti, oya itaala kutya uuna ya iipyakandhila itaya kala taya ipula unene, oshoka otaya kala taya piyaganeke omandhilaandhilo ngoka nomaudhano.
Okwa fatulula kutya ohaya idheula sha ikolela komilandu dhawo miitopolwa yawo.
“Onkene ota tu hiya aakokele opo ya longithe ompito ndjika ya eguluka ya tameke okukutha ombinga,” ta popi ngaaka.
Ekandjo okwa ti oliga ndyoka otayi kala tayi dhanena muupale utatu, Kembandu, Okamwandi nomOshakati. Omaudhano ohaga hwepopaleke wo uundjolowele womuntu nokuyakaleka kokule nokuninga iihakanwa yiinima inaayi uka.