Abraham Mwanyekange
Omupedumayola waNdangwa Nicodemus Amadhila okwahoololwa komalelo eedoolopa nhatu domOshana ongomukalelipo woshitukulwa koAssociation of Local Authorities of Namibia (ALAN), ta kalele po oshitukulwa oule weedula nhano. Amadhila okwa hoololwa oshivike sha dja ko moshoongalele shoshitukulwa shokodula.
Amadhila eshi a kwatafaniwa naye kuKundana okwa ti okwa pandula komalelo opaedoolopa eshi e mu tofa mo nokumwiinekelela oshinakuwanifwa shakula shoshitukulwa. Okwa ti nonande itashi ka kala shipu, okwe lilongekida opo a ka lwile eedoolopa domoshitukulwa shaye. “Ohandi ka kala ewi lomalelo opaadolopa aShana, unene ohandi ka pula opo koshimaliwa osho hashi yandjwa keedolopa shi wedelwe opo omalelo eedoolopa a dule okwiindjipaleka omayakulo oo hatu yandje kovakalimo vomeedolopa detu,” ta ti.
Okwa weda ko ta ti shikwao ota ka unganeka ovaleli vakwao opo va mone kutya ovakalimo vomeedoolopa unene tuu ovanyasha novakainhu nava kale va mona eemhito domawiliko osho yo okuninga omatokolo meedoolopa.
“Nonande omashongo omahapu ohandi ka longa noudiinini ndi mone kutya eeveta dimwe odo dikulu oda talululwa opo di dule okweendela pamwe nefimbo lonena, ohandi ka kendabala opo omalelo eedoolopa a kale e na ekwatafano liwa pamwe nepangelo lopokati, unene tuu okumona kutya ALAN okwa mona oikwafifo yopashimaliwa opo ookansela keedolopa va yandje omayakulo koshiwana Diva,” ta ti. Amadhila okwa kwashilipaleka kutya ye omukalelipo muwa nokwe linekelwa keedolopa domOshana ngaashi Ondangwa, Ongwediva nOshakati, notaka longa naana mouwa wado.
Okwaholola kutya eemhumbwe adishe odo di li po paife ongaashi okulongekida omadu, okuyambula po omaudano osho yo eenhele domalihafifo dovakalimo osho yo okulundululila eenghalamwenyo dovakalimo kouwa odo dimwe ta ka kala nokukwandjangela efimbo eli ko-ALAN.
ALAN ongonga yomalelo opaedoolopa moshilongo, oitukulwa aishe omu-14 moNamibia ohai kala i na omukalelipo umwe nelalakano ve litunge nokulipa omayele nghee ve na okuxumifa nawa komesho eedoolopa domoitukulwa yavo.
-abbenghilai@gmail.com