Auleria Wakudumo 

Kansela woshikandjohoololo shaKongo Efraim Shipindo okwa holola kutya ovakwashiwana momikunda nhatu moshikandjohoololo shaye ova fiwa pomutenya koshikungulu shomhepo eshi sha hanauna po oikunomwa yavo. Shipindo okwa ti oshikungulu osha fiya oilya aishe ya nangala momikunda Oluhapa, Ekango oshoyo Ekango lomuve moshikandjohoololo shaKongo. 

“Ovanhu ova li va longa noudiinini shili ashike paife itava likola mo sha vali momapya avo shaashi aishe oya hanaunwapo,” Shipindo ta holola ngaho. 

Kansela okwa ti okwa ninga nale onghendabala yokushangela kombelewa yangoloneya waHangwena oshoyo kombelewa yomuprima opo oshiwana osho sha kanifa oipalwifa yasho shim one ekwafo loipalwifa momukokomoko momudo fiyo oyou tau uya. 

“Otwa nyola omadina omaumbo aeshe oo a kumwa koshikungulu opo tu tale kutya otava mono omakwafo oludi la tya ngahelipi,” Shipindo ta holola ngaho. 

Mwene womukunda Ekango lomeva Temusha Shinyongo okwa holola kutya oshikungulu shomhepo osha hovela Olomakaya pefimbo lokomatangoelela okudja po17h00 fiyo 18h00 lwaapo. Okwa ti oshikungulu osha etelela eemaye. 

Kakele koikunomwa, Shinyongo oshikungulu vati osha fudula mo yo omiti odo dimwe deya okudenga oilya mepya. 

“Momukunda waye auke, omaumbo taa tengenekwa eli po40 lwaapo okwa kumwa koshikumungu eshi omanga eli puahetatu lwaapo a dengwa a divilika neenghono,” Mwene womukunda ta yelifa ngaho. 

Umwe womovakalimo ovo va dengwa va divilikwa Tomas Juuda (66) okwa holola kutya nghene a dalwa a pashukile oshikungulu sholudi olo. 

Meenghundafana naKundana Juuda Nakale okwa ti okwa hangwa ta vingile eenghwadabi daye eshi okalemo oko ka eta oshikungulu ka fika. Okwa ti okwa endelela a idilile eengobe nokukatala ovatekulu vaye ovo vali tava tyava popepi neumbo opo va ka hondame meumbo. 

“Oilya, omakunde, omatanga, omapungu, oilyavala nakeshe osho shali sha fikama aishe oya hanaunwa po. Eshi sha xupa mo mepya lange eefukwa ashike shaashi hadi kala medu,” Nakale ta holola nolukeno. 

Nakale okwa holola kutya fiyo opaife inava yamo mepya va tale ngeenge tava xupifa ngaho oilya imwe nonande aishe oya pwewa omafo yoo ili pedu. 

Mushiinda shaye, omukulupe weedula 65 Mika Lucas okwa holola kutya ina hangwa mo meumbo pefimbo loshiningwanima. 

“Omupya Munene inandi hangwa mo meumbo voo novaneumbo lange navo inava hangwa mo. Oikunomwa yange nayo oya hanaunwa po aishe,” Lucas ta holola ngaho. 

Lukas okwa ti otava kongo ekwafo shaashi kave shi kutya otava ka xupa ngahelipi moule womukokomoko wodula oshoyo odula ikwao fiyo tava ka lima vali. 

“Ngeno okwa li ovanhu tave ya okulitalela ko voovene op ova mone oukwashili mwaashi hatu popi,” ta ti ngaho. 

Shipindo okwa ti ota longo noudiinini opo a kwashilipaleke kutya ovo va hanauninwa po oikunomwa yavo ova mona ekwafo okudja kombelewa yangoloneya oshoyo lomuprima voo va shiive okukala tava kwata oshikukuta. 

-awakudumo@nepc.com.na