Ehangano lyedhina Environmental Investement Fund (EIF) of Namibia, olya mono oshimaliwa sha thika poomilliona N$236 okuza miifuta moka ehangano hali gongele oshimaliwa, momimvo ndatu dha piti.
Omukuluntu gwehangano lyo- EIF Benedict Libanda okwa ti ehangano lyawo ohali gongele oshimaliwa unene okuza miifuta mbyoka hayi vulu okuyonagula omidhingoloko ngaashi oonayilona, omataiyela, oopatili, oohauto tadhi ya moNamibia osho wo iikwamagadhi.
“Iifuta mbyoka ohayi gongelwa kepangelo okupitila miinyangadhalwa ya yooloka. Natangoohatumonowooshimaliwa okupitila miishoshela hatu mono uuna twa yambindhindha aanangeshefa noshimal iwa shontumba,” ta fatulula ngaaka.
Libanda okwa ti, oshimaliwa shawo ohaye shi longitha okuyambidhidha ooproyeka dhi na sha neyopaleko lyomidhingoloko osho wo ekalekepo lyuushitwe.
Onkene oya yambidhidha oproyeka yedhina Ombika Recycling Station mEtosha ndyoka ya patululwa pambelewa, noshimaliwa shoomilliona N$4,9.
“Oshimaliwa shoka osha yambidhidha okuya po nehala ndyoka opo ku kalekwe ehala lyayela osho wo okunyanyula po iiyagaya mbyoka tayi kakeke Etosha noku longulongulula iikwanayilona,” ta fatulula ngaaka.
Okwa fatulula wo okutya oshimaliwa inashi longithwa ashike pehalo mpoka, ihe osha longitha wo natango iilongitho yilwe, ngaashi iiyenditho nosho tuu.
Minista gomidhingoloko iihwa nomapashiyono Indileni Daniel, ngoka a patulula ehala ndyoka pambelwa okwa ti, ehala lyokoopaleka otali ka yambidhidha okugongela iiyagaya ya ekelwahi kaatalelipo mEtosha.
Ta ti, iiyagaya ngaashi oonayilona, uukende, oondooha, oombapila niikulya ya ekelwahi, otayi kala hayi gongelwa nokweekelwahi pamukalo opo kaayi halakane.
“Shika otashi ka kwathela okukaleka Etosha lya yela nokugamena iiyamakuti kiiyagaya mbyoka yaa na okulya,” ta popi ngaaka.
Ta fatulula kutya uuna iiyamakuti ya li iinima inaayi wapala otayi vulu okuehama ee tayi si, nuuna ya tetwa komakende otashi tula iiyamakuti moshiponga.
Minista okwa ti okukaleka Etosha lya yela oha ku li monikitha nawa no hashi hili wo aatalelipo.
vkaapanda@nepc.com.na