OSHAKATI – Okwa lopotwa oibofa ihapu mOshakati yovanhu tava tula omapangwe moikulya nelalakano lokutwaalela ovanadolongo ashike opolifi oya kotoka okukala ya tala moikulya tete ndele tai kwata ko omapangwe oo. 

Omukulunhu wopolifi moshitukulwa shaShana , Komufala Naftal Sakaria okwa ti ovanhu otava kendabala nomikalo da yooloka okutwaalela ovanadolongo oikulya mwa holekwa omapangwe ashike ovapolifi ove li oupafi okukala va konakona oikulya oyo ndele tava kufa mo omapangwe a holekwa mo.

Omaandaxa, omulumenhu weedula 24 okwa kwatwa po eshi a tula omapangwe moikulya nelalakano lokutwaal e la omunadolongo. 

Oshiningwanima osha ningwa koshitaasai shopolifi mOshakati efimbo longula. 

Omulumenhu ou okwa dja molukanda Uupindi. 

Opolifi oya hokolola tai ti omapangwe okwa hangika a holekwa mokati kombelela oyo kwa li tai twaalelwa omunadolongo. 

Oshivike dja ko, natango koshitaasi shopolifi mOshakati okwa kwatwa omulumenhu eshi a tula omapangwe meefewa nomomaadi okuvava nelalakano lokutwaalela omunadolongo. 

Omapangwe aa okwa monika pefimbo opolifi kwa li tai hade moinima oyo tai twaalelwa omunadolongo. 

Omudo wa dja ko, natango omukainhu weedula 23 a dja molukanda Uupindi okwa kwatwa po eshi kwa li a holeka omapangwe pokati koshifima osho kwa li ta twaalele omunadolongo. 

Komufula wopolifi mOshana Sakaria okwa pandula ovapolifi eshi tava longo nondjungu nokukwashilipaleka kutya ova kwata ko oingangamwifi tai vakelelwa ovanadolongo 

“Ovanhu otava ti pamwe ovapolifi ova kofa. Omapangwe oku na okumonika ashike nande naa kale a holekwa mokati koikulya,” ta ti. 

Okwa ti ovanhu ovo ve na elalakano lokutwaalela ovanadolongo omapangwe otava mane po efimbo lavo shaashi ovapolifi ove lilongekida okukala va kwata ko omapangwe. 

“Omapangwe inaa pitikwa modolongo. Osha nyika oshiponga ngeenge omunhu ta longifa omapangwe,” ta ti. 

Sakaria okwa kumaida oshiwana opo shi longele kumwe nopolifi okulopota kombinga yovanhu tava longifa omapangwe. 

-fhamalwa@nepc.com.na