ETOSHA – Aayelele mboka taya ithanwa nedhina lyoshinanena ongaAasan oya li ya mwenyeke oshigwana sho kwa li ya dhana iidhano yopamuthigululwakalo ya yooloka. Tango okwa li kwa dhanwa iidhano kaanona omanga ongundu yaakuluntu inayi ya mondambo.

Oueb Paul, omukwatelikomeho gongundu yiidhano yopamuthigululwakalo okwa ti iidhano ayihe ya dhana oyi na shoka tayi ti.

“Itatu dhana ashike mombepo ihe otatu popi okupitila miidhano, sho tatu lala pevi ngaaka otatu yamukulathana naadhani aakwetu,” ta popi ngaaka.

Esiku ndyoka oshigwana okwa li sha nyanyukwa nosha li sha pula natango ya shune mo mondambo. Omuyelele gumwe ngoka a li ayi moonkundathana noshifokundaneki shika Salti Ndjama, okwa fatulula ta ti, omuhoko gwaayelele moNamibia otagu popi unene aakalimo mboka ya talika ko aadhinwantu, aathigwa, nenge mboka ye na uukwashigwana wa nkundipala, unene tuu mboka haya kala momikunda dha dhengwa koshikukuta osho wo aantu yomithigululwakalo dha yooloka ngaashi yo, Aasan.

“Omuhoko gwetu ogwa tseyika nawa unene monkalo yawo yokukala muushitwe, unene tuu monkalo yokutema omulilo pamuthigululwakalo, okuumba uutati, nosho wo uunongo womiti dhopamuthigululwakalo,” ta fatulula ngaaka.

Ta ti ashike ohaya taalele omashongo ogendji ngaashi onkalo yoshikukuta, uupyakadhi womalovu, nosho wo okukala ya talika ko ye li konima yesiga moshigwana.

Ndjama okwa ti onkalo yelongo oyi li tayi lunduluka, oshoka aanona oyendji ohaya yi kosikola, yo sho taya koko kakwa li yu uvite esimano lyelongo.

-vkaapanda@nepc.com.na