Abraham Mwanyekange 

Eeshoke Chula Chula oda pumbwa okuninga haluni nopeumba eshi te ya a talelwe po koAfrican Stars noKhomas Nampol moudano woNamibia Premier Football League (NPFL) ngee okwa hala okufindana ekopi lo-NPFL neudo. 

Chula Chula okwa pumbwa okulikola oitwa ihamano monavi iyeke ei ngeenge okwa hala okumona omhito iwa opo a findane po olixa yopombada moshi longo. Chula Chula ota dana noAfrican Stars mongula potundi 16h30, omanga mOsoondaxa ota ka taalela Khomas Nampol potundi 13h00 mokapale kOshakati Independence. Ou e shi endifa nawa pokati koChula Chula noAfrican Stars ota mono omhito iwa yokufindana po o-NPFL. 

Chula Chula noAfrica Stars ova landulafana moitwa. Stars oyo i li pombada noitwa 50, tai shikulwa koChula Chula noitwa 49 omanga Ongos Fc naye ota taataya mo noitwa 44. 

Omudeuli woChula Chula John Sikerete okwa lombwela Kundana ta ti ove lilongekida nawa okutaalela espaana dokoWindhoek. “Keshe oudano otwe u tala ko wafa omaudano akwao, onghee kape na shimwe shi li po shihe fi okufindana omaudano etu opavali molwaashi okwa fimana kufye,” ta ti. 

Sikerete okwa ti nonande ovadani vamwe ova fiya po ospana petameko lomaudano o-NPFL inashi va shunifa omutwe moipeta. Okwa ti elalakano lavo okwa li ashike va hala okudana opo vaha we mo molixa yopombada, kakele paife okuudite ounambano eshi tava kondjele epapa noStars. 

Ou ta ka mona oitwa ihapu pokati kaChula Chula noStars ota ka mona omhito iwa yokufindana po olixa neudo. 

King Kauluma Palace (KK) nayo otai yi mondabo mongula eshi tai taalele oKhomas Nampol, omanga mOsoondaxa otai taalele Stars pokapale kOshakati Independence. 

Omudeuli wopokafimbo wo- KK Palace Sakaria Shafa 

Kambonde okwa ti oStars noNampol nava kale shi shi kutya kOshakati itava di ko noshitwa. “Kaku na oitwa yoshali oku, shiiveni noxo ondjokonona yaaku, ileni otwe lilongekida nawa,” ta ti. 

Kambode okwa indila ovayambididi ve uye momwaalu uhapu opo va yambidide o-KK Palace. 

-abbenghilai@gmail.com