NKURENKURUS – ǀHaob ain ge 1 779 ǀasa ǀawa!namn 2024/2025ǁî kurib !nâ ge ǁkhāǁkhākhâidi !aroma ǂgaikhâihe hâ, ina ǁkhāǁkhākhâis khao!gâ !kharaga !ādi ǁga !hūb a ǂhabase ge sîǂuihe. 

!Hūb di ǁÛs, Netumbo Nandi-Ndaitwahs ge ǂoa ge wekheb di Denstaxtsēs ai ǁîs di Kurikorobe Gowaǀîs !Hūǁîn !oa hâs !nâ gere mîs !oagub ge nēba a !â, ǀaweǁguib mâtin !norasasib tsî ǁawosasiba !hūb !nâ nî ǁawoǁawos diba. 

Hāǀaro rasen ge 426 mâisana Namibiab !Khō-om !Oabas !nâ ge !gaehe, ǁnāpan 404 ǀasa mâisana nēsi ǁkhāǁkhākhâidi ǀkha a ǁaxa hîa. 

ǁNāpan ge 2 419 ǁanina Namibiab ǁKhaubas ǀHûs (NDF) !aroma ǁkhāǁkhākhâide ǁkhaubas ǀgaugu tsî ǁnâu!āb ǀkha sîsens ǁkhāsigu hîa dixitale ǂansa !khōǂgā hâgu !nâ ge !khō!oa. 

Nē ǁkhāǁkhākhâidi ge !Naniǁî !Hū!nāsi Omkhâisens (NDP6) ǂgaoǀkhādi ǀkha a !hûǁaresa.!Hūb di ǁûs ge ǁaesa noxopa a mîbas ge, 1 705 ǂkhamkhoen 18ǁî ǁkhāǁkhākhâis !nâ !gao!gao ǁkhaubas ǂnamipe ra ǁkhāǁkhākhâihe tsî ǀaweǁguiba !oa nē kurib !Khaitsâb !nâ nî dītoasa. 

Sao ra ǁkhāǁkhākhâis ge 1 500 ǂkhamkhoena nî !khōǂgā, hîa 600 ǂkhamkhoen !Hū!nāsi ǂKhamkhoen !Oabas !nâ-ū ǀnai ǀnî ǁkhāǁkhāsende !khō!oa hâna nî !khōǂgāse. 

“ǁGūbas nē ǁkhāǁkhākhâidi dis ge, ǀawa!namn tsî ǁkhaubas ǀhûra ǀgaiǀgaisa, xawe ǁkhā soab ai ǂkhamkhoen hîa ǁkhāsiga ūhâna ǂgâxa-ūsa hoa ǀkhariga xu,” tis ge Nandi-Ndaitwahsa ge mî. 

Ai!âs ge !hūb di ǁûsa a mî !khais ge, Namibiab ǁKhaubas ǀHûs di hāǀaro ra !ereams, ǂkhâ!nâsas nî aiǁgause dâu!khudi, ǀkhurub tsî ǀaeǂhuwigu ǁaegu !nâ māsa. 

“August 26 ǂnûiǂgās ra mā xūn aiǁgause sîsensarana ǂoms, ǂhâbasa xūna ǂgaoǀkhāsa ǀnōb ai omkhâis, loxistikn !oabade mās, texnoloxib ǂnamipe hâ ǀasa ǂâiǀgaugu tsî hân ge ǁKhaubas ǀHûs di sîsenni ra ǁgauǂui sîsenni ǁkhāsiba ai!gû rase ra mā,” tis ge !Hūb di ǁûsa ge mî. 

– Nampa