OSHANDI- Ongudu hai dana eengoma ya shivika nawa nedina Haimbodi Mutoteli oi na omakanda haa denge eengoma nelalakano lokumwenyeka oshiwana. 

Ongudu ei oya totwa po omudo 2019 komukunda Oshandi moshitukulwa shaHangwena. Oyo imwe ya shivika nawa ongongudu i na omanyakwa haa dana oidano yeengoma. Selma Hashimbola ou e li omuwiliki wongudu ei okwa ti elalakano lokutota po ongudu yeengoma okukaleka po efimano lomufyuululwakalo. 

Okwa ti ongudu yavo natango ohai dana oidano yeenghama. 

“Ohatu dana koivilo ya yooloka nelalakano lokuongela oshimaliwa shetu fyee tu dule okuyambidida omaumbo etu. 

Okwa ti ngeenge owa hange tava dana omunhu keshe okuvo ashike a tala te linyenge shaashi ohava dana nawa. 

“Fyee ohatu imbi nawa, hatu tangumununa omaimbilo Oshiwambo,” ta ti. 

Okwa ti mongudu yavo ove li 15 mwa kwatelwa ovalumenhu. 

Okwa weda po ta ti omunhu keshe okwa manguluka okuwaimina ongudu yavo. 

“Ngeenge owa hange omakanda omongudu yetu taa denge ongoma oto fuuka. Ongoma tai dengwa komunhu ta kina komutwe ndele to mono kutya mboli omanyakwa oko e li kOhangwena,” ta ti. 

Okwa yelifa ta ti moshitukulwa shaHangwena omu na omanyakwa ngeenge tashi ya poidano yoshiwambo. Hashimbola okwa ti ohava kala ve na ovakainhu va dikwa oipole tava kani ngaashi naana ovafuko hava ningi ngeenge tava fukala mefundula yeengoma. 

“Ovanhu ovo ve na oivilo ndele ova hala okumwenyekwa nava kwatafane ombelewa lakansela woshikandjohololo shaNdobe. Ohatu fiki diva koshivilo shaashi otwa hala okuyambula po ongudu yetu,” ta ti. 

Okwa ti moshitukulwa shaHangwena omwa pumba eengudu dokudana oidano yeengoma. 

“Oshiwana na shi twikile okuleka po efimano lomifyuululwakalo,” ta ti. 

Oshivike sha dja, kOmukunda Oshandi, ongudu ei okwa li tai dana pefimbo olo ngoloneya waHangwena kwa li a ka yandja onduda yokunangala pambelewa ya tungilwa omukulupe e na oulema. 

Oshiwana okwa li tashi kini komitwe shaafuuka eshi omanyakwa ta denge ongoma vo ovakainhu tava kini komitwe. 

-fhamalwa@nepc.com.na