Omupresidente woshilongo Netumbo Nandi-Ndaitwah okwa teelelwa oye a ka kale oshipala shoshivilo shopamufyuululwakalo osho sha shivika nawa Omaludi Festival, kOkongo moshitukulwa sha Hangwena.
Omaludi oo a teelelika a ka tameke mo 25 fiyo 30 Apilili otaa ka tameka nouvalelelo wonhomenawina, mo 25. Mefiku olo tu olo, nomupresidente okwa taleelika a ka nangeke oshitufi pambelewa, ye oye taka kala yoo omupopi a fimana.
Omukulunhu welelodoolopa laKongo Jackson Muma okwa ti oshikando eshi oshititano odoolopa tai dimbuluka oshivilo sholudi eli.
“Otwa teelela ovakwashiwana tava di keembinga da yooloka doshilongo, oilyo yomutumba wopashiwana tai ka enda pwamwe nomupresidente naikwao ya wedwa po,” ta ti.
Okwa twikila kutya oshitufi otashi ka danenwa modoolopa mwo vene, omo ovanangeshefa, vakwashiwana oshoyo ovanafaalama navo tava kufa ombinga.
“Ovanhu ava ova teelelwa vaete eengobe davo komafiyafano, odo da deulilwa onomenawima opo dikufe ombinga moudano ou,” ta ti.
Okwa twikila kutya eengobe edi tadi kufa ombinga ohadi li kalekelwa mwaadi ita di kufa ombinga.
“Shima efimbo lokuya mondabo lafiki, oovene veengobe edi tadi li kwata ohava fikama, navo opo va dule oku sapota eenghwandabi mokuditanga eshi tadi dana mokapale nai kwao ya wedwapo ngaashi oku di hongaifa oshoyo oku popya nado momalaka ayooloka,” Muma ta twikila.
Ponhele youdano nomafiyafano, natango omaludi oku li omhito yakula kovanangeshefa vomodoolopa veuye valandife oinima yavo pefimbo loipindi ei.
“Ohatu mono ovakalimo vahapu, unene ava vomangeshefelo opedu tava kufa ombinga mokulandifa oinima yayooloka unene yopamufyuululwakalo,” ta ti. Muma okwa yelifa yoo kutya ovanangeshefa ava ohava kala vahafa neenghono, shaashi eli olo unene efimbo hava mono ovanhu lela va hapu ta veya oku talelapo odoolopa, voo tava nghonopaleke eliko lomodoolopa moku sapota omangeshefelo opedu.
Okwa twikila kutya ngeenge tashiya povanafaalama, navo ohava mono yoo omhito yoku ngeshefa oimina yavo, oshoyo oingumutulu ei hava longo keenyala momapya nomeefaalama davo.
Muma okwa ti otai ndile oshiwana shi uye shikufe ombinga, voo va dule yoo oku yambidida mokusapota omngeshefelo opedu.
-taimihaihambo2000@gmail.com