ONDANGWA – Minista Woikwameni neameno lokeengaba Lucia Iipumbu, okwa pandula elelo kevyulonghalo kOluno moshitukuwla shaShana, eshi tali longo nawa.
Edi okwe di popya Etitano eshi a li a ka talela po evyulonghalo ye a tale onghalo yovanadolongo, ovapolifi osho yo omudinginoko aushe koonono nghee tau shi endifa osho yo omashongo aa hava kala noku taalela.
“Eshi sha shambula nge unene osheshi kutya keedolongo adishe edi nda enda, konyala onda hanga ashike di hadi, da pitilila omwaalu wovanadolongo ava va pumbwa okukala va idililwa mo. Ashike Oluno oya humbata ashike omwaalu wovanadolongo ava va pumbwa okukala ve li mo,” ta ti.
Iipumbu okwa twikila kutya evyulonghalo natango otali yandje oshihopaenenwa shiwa shaashi otashi ulike kutya, oimbuluma moshitukulwa oi li mo tai kondololwa. Iipumbu okwa ti okwa lopotelwa yo komukulunhu wevyulonghalo kutya odolongo oi na ovanashilonga vashona neenghono, ashike nande ongaho ava ve li mo ihava fiye emanya la londa kulikwao.
“Onda hafa shili shaashi oilonga otai longwa, lo elandulafano otali kalekwa po, nande ovanhu ovanashilonga kave li mo lela va wana nawa,” ta ti.
Iipumbu okwa ti okwa nhofwelwa ko kutya, ope na ovapolifi vamwe itave lihumbata ngaashi shi na okukala.
“Vamwe omwa didilikwa mu na ekwatafano lapuka novadolongo, noku va ninga nawa, shaashi ashike mu va shi ile mu shi ovapambele vavo. Vamwe omu li mo ndele itamu wanifa po oilonga yeni. Ovaleli nanye itamu yandje alushe eelenga ngaashi shi na okukala, ndele moilonga yeni omuhadi unene okatongo osho yo oukombuda,” ta ti.
Iipumbu okwa yelifila ovapolifi eshi shi li mondjila, naashi sha teelelwa. Okwa ti nava longe ve li koshi yoveta ei ye va tula moilonga shaashi ngeenge ova longo ngaashi va hala, nokuninga eshi tashi tauluka oveta, ova teelela va kanife oilonga yavo ngomashendjo. Minista mokutalela po evyulonghalo natango okwa pandula yo evyulonghalo eshi le lipaka mo mokulonga noudiinini, ngeenge tashi ya pokulonga oikulya yavo vene. Modolongo yaLuno omu na ounafaalama woingulu, oyo hai kala oshivelelwa shovanadolongo, notave shi endifa nawa shaashi ngaashi paife ngaha, ove li tava topolelafana yo needolongo dikwao.
Iipumbu okwa twa ovanadolongo omukumo va longele omahandukilo avo nombili, vo tava kala yo ve na omikumo shaashi kondje yokakuma natango oku na onghalamwenyo ipe ye va teelela.