Ministers, ǂUrusib dis, Dr Esperance Luvindaos ge ǂoa ge wekheb di Donertaxtsēs ai ǀasa ǀawemā!nans ǁanin National Institute of Pathology (NIP) dis dina ge ǁgaumâi, sao ra !nona kuriga nî nē nûiǂgs !ereamsa tanise. 

Sao ran ge nē ǂnûiǂgās ǀasa ǁanina; Stephanie Viljoens hîa aiǂnû-ais tsîna is, Lucia Kazetjikurias hîa !nakaǂnôa aiǂnû-aosis !haros !nâ nî !oaenbas, Helvi Haludilus tsî Chris Hiquanob hâna. ǁÎn di sîsenxasigu ǀkhan ge nē ǁkhâb tsoatsoas ai go ǂnāǁnâ.

Ministeris di dana beros ǀAe-ǁgams di Huriǂoas!nâ mâs tawas ge ǂhaitsi ǂanǂansa gere mā soab ais ge Luvindaosa, ǁîs di ganganxasiba ǀorose go hâ i ǀawemā!nans di ǁanina, nē ǂnûiǂgās di ǀomkhâis !nân ge dī ssengu !aroma mā tsî ge mî, ǁîn di !garise sîsens tsî ǁguiǂgāsens ǀkhamasa !gao!gaoba nē go ǀasase a ǂgâxa ǂgaeǂguis !aroma ge -ǁguisa. “Tita ge ǁîn di ǁaeba go sîsentoa ǀawemā!nans ǁanina gangansa ra mā, ǀō-aisa !âs hîan ge nē ǂnûiǂgās, ǂhâǂhâsa !âsa ra ǀhurus !nâ a ǀaros tsî ǁîsa ǂhanu ǀkhāb ǁga a ǁnumi-oas !aroma. Sadu ge Namibiab di ǂnûiǂgās nēs di !â du ase ǀgaisa !âsa sao ra !kharigu !nâ ge ǀhuru, ǂgaiǀons ai !oabadi ǁaeb ai !hūǁîna nî māhes tsî ǁawosa 1gao!gaob hîa du ge nē ǀasase go ǂgâxa ǂgaeǂguisa a ǁguibab tsîna. Sadu ge buruxa gaub !nâ ǂurusib dīǀgaugu !nâ kai !âba ge ǀhuru,” tis ge ministersa ge mî. 

ǀAsa ǂgaeǂguisas ge Luvindaosa ge mîba, !nurigu ai a !gao!gaosa sîsenǀgaubas ra ǁkhore !khaisa, tsî ǁîna ge ǂgan, oresa hâ a ǂurusib !oabade mās ǂnamipe !gomsin, ǁîn !ereamxasigu !naka ra ǁnān !aroma ka-ai tsî sîsenxa sîsenǀgauga nî ūhâse isa. ǁÎs ge ǂhanuse tsî ǂgaoǀkhāsa !harib ai sîsenna dīsas ra ǀgomǀgom!gao soab ai ge mî, ǁama!khunigus ǀkha hâ ǀhôakao!naris ǀguis khami ī soa-e nē asa ǂgaeǂguis !nâ ūhâ tama hâsa, “!Âubasendi ge kaise a ǀgapi. 

ǀAsa ǂgaeǂguis ge ka-aise sîsen, !nuriga nî !gāsase ǁgau dīǀgauga ūhâ tsî hoana !nāǂamhâse, ǀhôakao!narib daosa nî ǂganam,” tis ge Luvindaosa ge ǂgan. Viljoens hîa sao ra !nona kuriga nē ǂnûiǂgāsa nî ǂgaeǂguis ge ǁîs di !gaehes sîǂkhanisas gere !khō!oa soab ai ge mî, ǁîsa i a aiǂhanuba !khaisa nē !haros aiǂnû-aosis dis !nâ ǀawemā!nansa ǂgaeǂgui tsî ǂnûiǂgāsa ais -ga ī-ūsa. ǁÎs ge ǂhanuse tsî ǂgaoǀkhāsa ǀnōb ai ǂgaeǂguis, ǂhaitsise sîsens tsî sîsenǁareb hâna dana ǁnâugu -ǁîs ǂgaeǂguis nî !gaoǁgui-ai gu ase ge mîǁgui.