Opuwo- Omupresidente Netumbo Nandi-Ndaitwah okwa ti osha fimana ngeenge ovanhu ve li fimaneka, ve na oukumwe nokulongifa ouyuuki koilonga.
“Ovanailonga na va fimanekwe, ovanhu koilonga ina va ningilwa okatongo shaashi aveshe ovanailonga,” Nandi-Ndaitwah ta ti.
Edi Omupresidente okwe di popya Etitano kOpuwo moshitukulwa shaKunene kedimbuluko lefiku kovanailonga.
Efiku e li oha li dimbulukiwa mefiku 1 Mei omudo keshe.
Neudo ola dimbulukwa koshi yoshipalanyole ovanailonga vomoshilongo tava pula omadeulo moilonga opo va dule okushipondola okueta po oidje mo iwa.
Ovanailonga va dja koitukulwa ya yooloka okwa li va holoka momwaalu muhapu ve udite etumba okudimbuluka efiku lavo.
Efiku e li okwa li la mwenyeke keengudu da yooloka ngaashi Ndilimani osho yo okungudu yoshidano shomufyuululwakalo shOvahimba.
Nandi-Ndaitwah okwa holola kutya ehangano li li po ovanailonga moshilongo opo shi kwashipaleka kutya ovanailonga ova mona eemhito dokuya komadeuko e na sha noilonga yavo.
Okwa ti ehangano olo li li po ovanailonga ina li kala ashike ta li pula ovanailonga va wedelwe eendjabi davo ndele na li kale natango ta li xwaxwameka ovanailonga va ye komadeulo.
“Omadeulo okwa fimana komanailonga keshe. Ovanhu nava twikile okupewa omadeulo kombinga yoilonga yavo opo va mono ounongo nokulihonga oinima ipe,” ta ti.
Omupresidente natango okwa yelifa ta ti mefimbo e li loshinanena ovanhu otava longifa ounongononi wopaungoba okupitila komalungula.
“Ovanhu otava dulu okuninga omadeulo okupitila komalungula. Omunhu otadulu oku li honga ile a mone ounongo okupitila komalungula ngeenge ta tale ouvidio,” ta ti.
Nandi-Ndaitwah natango okwa pula ovanailonga opo va longife eemhito dokuya kofikola nelalakano lokuliwedelako keedjapo davo.
Okwaa ti epangelo ola tumbaleka oilonga iwa tai longwa kovanailonga.
“Ovanailonga otava longo koikondo ya yooloka okuyambula po eliko loshilongo. Omunailonga keshe okwa fimana shaashi oilonga yaye otai dana onghandangala moshilongo,” ta ti.
Okwa weda po ta ti efiku e li ola nuninwa ovanailonga okuyandja efimaneko kuvo.
Omunashipindi wehangano lovanailonga loNamibia Federation Libonina Nawa okwa ti efiku e li ka lishi ashike okudimbuluka ovanailonga ashike natango omhito yokushakena okukundafana omashongo aa taalelwa kovanailonga osho yo nghene taa kandulwa po.
Lucia Hafeni e li omuwapaleki kofikola okwa hokolola ta ti efiku ola fimana kuvo shaashi ota li ulike kutya mboli ovanailonga otava longo oilonga iwa.