ONDANGWAS – Ministers !Auga!hūsi !Gaeǁaredi tsî ǂharugub dis, !Hūǂnûǁkhaeba-ao Selma Ashipala-Musavyis ge ge mî, ǁîs ministeris di !ereamxasib, Namibiab di ǂharuguga !auga!hūsise nî ǂanǂan tsî turaba ǁawoǁawo !khaisa, sâsa tsî ǀomkhâis a ī!nâ ǁkhā ǂnamipeba ǂnuwis !nâ-ū. Nē ǁgauǂuidi ge 24 !Hoaǂkhaib 2026 dis ai tsoatsoa tsî 2 !Khaitsâb 2026 dis ai ge !gûǀam.
“Ministeris ge ǁaupexa ǀhawe-ūs a ǂgaekhâib, ǁGuiride ǀGaiǀgais ǂHanumās dib tsî !gûǀhao ra daoǁgaugu ǀkha ra toa, tsî ǀgūǁae !Haosi ǂNûsa nî ǁgui-ai!â.
Sida ge !hū!nāsi tsî !auga!hūsi khoen ǁaxasina ra ǀaweǁguin ǀkha sîsenǁares !aroma a ǂhomisa, !amkuse tsî ǂkhîǂkhîsa ǀgaub !nâ ra !gûǁnâ -axasina ǁawoǁawos ase,” tis ge ge mî. Nē ǁgauǂuidi ǁaxasib hîa Ondangwas !Ā!nāsi ǀAwemā!nans xa ra ǀaweǁguiheb di ǂgaiǂams nē kurib !aromas ge, !Hūǁ-are !hū!nāsi ǂHaruguba !Hūbaib ǀkha, ti ge hâ i.
Nē ǁaxasib hîa !huis âba, !hū!nāsise ge tsoatsoab ge nēsi !auga!hūsi ǂharuguga ge ǂgae, Namibiab !augaba xus tsîna ǂhaugu-aona ǀgapi !gôagu !nâ !kharu ge kuriga xu hare tsî harase ǂharugub ǂnamipe ǂandi tsî ǁkhāsiga ǀgoragus !aroma.
Nē kurib ǁaxasib ge 210 ǁgauǂui-aona ge ūhâ i, Tanzaniab, Kenyab tsî Zambiab hâgu dina Namibiab !augaba xu ge ūhâ ise. Ashipala-Musavyis ge ge mî, Namibiab !hūǂnûǁkhaebadi !nâ-ūs nē ministerisa Namibiab xūn, !oabadi tsî tsî hâ ǁkhā a ǁguiris !ēde ra ǂan kaisa.
Ai!âs ge mîs ge, ministeris ra ǀoasase ǂharugu ǁgauǂuin khami ī ǁ-axasina ǂkhâ!nâsa, ǁîn ra !hūb di omkhâisens ǁgūbadi tsî sâuǁkhāsiba hoa !hūbaisise ǂapaǂoa kai amaga.
Oshanab ǀkharisi mûǂamaob, Hofni Iipingeb ge ǁkhā ǁaxasib tawab gere !hoa soab ai ge mî, nē ǀkharib noxopa ǁawosase ǂharub ai!gûs, sâuǁkhāsiba nēs !nâ-ū ǀomkhâi kais tsî !om!khōgus !nâ mâsa.
“Ondangwas ge Oshakatis tsî Ongwedivas hâra ǀkha ǀhao hâse ra ai!gû, ǁâǂkhōb ase !hūb di sâuǁkhāsib ǀomkhâisa ības !nâ,” tib ge ge mî. Iipingeb ge mîs ge, 8ǁî ǂgaeǂguis !nâ nî aimâihese a ǀaweǁguisa !khaidi di !namab ǂnamipe, ib ǂhâsiba hâsa sâsa tsî ǀomkhâis īǁkhāsiga ra mā ǂnamipega ǂnuwisa, ǂharugun !gōsase ǂkhamkhoen tsî taresib !aroma.