OLUKEKETE – Omupresidente Netumbo Nandi-Ndaitwah okwa tumbaleka nokuyandja efimaneko kovanhu va xulifila moCassinga omo a popya kutya efiku e li ola fimana mondjokonona yaNamibia.

Omupresidente edi okwe di popya onghela kefiku ledimbuluko laCassinga olo la dimbulukiwa komukunda Olukekete moshitukulwa shaMusati. Natango efiku olo, Omupresidente okwa talela po ombila mOutapi omo mwa fudikwa ovanhu 27 pefimbo loita.

Okwa tula eengala kombila ei okuyandja efimaneko kuvo.

Efiku ola dimbulukiwa koshi yoshipalanyole tashi ti okudimbuluka oonakulwa vetu nokuvatumbaleka.

Oshiwana, ovaleli vopapolitika, ovaleli vopamifyuululwakalo osho yoonakulwa vakulu  okwa li va holoka momwaalu muhapu okudimbuka efiku eli.

Efiku 4 Mei 1978 oha li dimbulukiwa omudo keshe omo ovanhu vahapu mwa kwatelwa ounona va kanifa eemwenyo davo moAngola.

Ovanhu ova xulifa omanga vamwe ova lemana konima eshi va ponokelwa kovakwaita vokatongotongo mokamba.

Oixupe moCassinga okwa li va nyika oluhodi tava imbi omaimbilo okudimbuluka vakwao ovo va xulifa.

Omukaleliposhilongo waAngola osho yo Cuba navo okwa li va holoka kefiku kedimbuluko loCassinga nelalakano lokuulika oukumwe wavo naNamibia.

Nandi-Ndaitwah okwa Namibia ota twikile okudimbuluka efiku e li shaashi ovanhu ovo va xulifa ova dana onghandangala ya kula.

“Okwa li tava lu moita nelalakano opo Namibia a manguluke. Ka kwa li shipu,” ta ti.

Omupresidente okwa ti ongudu yoswapo oya pandula oonakulwa vakulu molwaashi ova longa oilonga tai hokifwa okukondjela emanguluko loshilongo.

Ignatius Mwanyekange ou e li naye axupa moCassinga, nokuli a popya ponhele ya vakwao okwa ti efiku oha li va etele  oluhodi shaashi ohave li pula vakwao ovo va xulifa moita.

“Oshiponga shomboma oyo ya dipaa vakwetu natango ota shiluma momitima detu,” ta ti.

Okwa ti ka kwa li shipu okukala moAngola pefimbo loita shaashi ova mona oixuna eshi va dengwa.

Mwanyekange okwa ti eshi  otashi va dimbulukifa kutya emanguluko ola dja poundju.

Okwa pula epangelo opo li twikile okuyambidida oonakulwa vakulu.

“Onda pandula epangelo letu eshi lina oshisho okudimbuluka efiku eli,” ta ti.

-fhamalwa@nepc.com.na