OSHIKANGO – Okwa lopotwa omukeeleli womaliko womulumenhu weedula 32 a ponokelwa kookalyamupombo pefimbo olo kwa li ta longele pongeshefa ndele ta mangwa keenyala nokomaalu, neembudi oda vaka mo N$200 000.
Oshiningwanima osha ningwa mexuliloshivike mokati koufiku lwopotundi 02h00 pongeshefa yedina Hakahana i li mOshikango, moshitukulwa shaHangwena.
Ongeshefa Hakahana ohai longo nokulandifa oshimhoko sheehaasa omo oshiwana shomomudingonoko waShikango osho yo omikunda di li popepi hashi teke eehaasa davo ngeenge da pumbwa oshimhoko.
Omukulunhu wopolifi moshitukulwa shaHangwena, Commissioner Otillie Kashuupulwa okwa koleka oshiningwanima eshi.
Otaku hokololwa kutya omuleli womaliko okwa nyekwa ondjebo yaye keengangala edi.
Opolifi oya hokolola tai ti tete omukeleli womaliko okwa ningilwa omatilifo efyo nondjebo.
Okudja opo ovafekelwa ova nuka ekuma ndele tava tete meembuli dombelewa omu hamu tuvikilwa okakefa koimaliwa.
Opolifi oya hokolola tai ti ookalyamupombo vovalumenhu vane ove ya notuwa pongeshefa tuu opo.
Otaku hokololwa kutya ova faduka po va uka motuwa nokakefa koimaliwa.
Opolifi oya hokolola tai ti eengangala eshi da manga omukeleli womaliko ou oda ukilila du uka mombelewa omo hamu tuvikilwa okakefa koimaliwa.
Otaku fekelwa kutya eengangala edi odi na ouyelele kutya okakefa koimaliwa ohaka kala peni shaashi eshi da fika pongeshefa inadi kwatakwata oda ukilila ashike pokakefa.
She likwatelela kouyelele wa monika po kuKundana, otaku hokololwa kutya vati pongeshefa ei opa taatawa ovanailonga omwedi wa dja ko.
Eshi a kwatafana naKundana onghela, omukulunhu wopolifi moshitukulwa shaHangwena Kashuupulwa okwa ti oshimalwa shi fike po N$18 000 osha monika sha hangika sha wila pondje pongeshefa tuu opo.
Okwa yelifa ta ti fiyo opapa kape na omunhu a kwatwa po mekwatafano lomunyeka ou.
“Opolifi oye lipyakidila nokuninga omakonakono omoule kombinga yomunyeka ou,” ta ti.
Okwa pula moshiwana kwaau e na ouyelele kombinga yokaalyamupombo ava opo shi potele opolifi keshe i li popepi.
Okwa koleka kutya omukeleli womaliko ina monifwa oshiponga.
-fhamalwa@nepc.com.na