ONGWEDIVA – Omunambelewa konooli wehangano lokuyandja ohonde loNamibia Blood Transfusion Services (NAMBTS) Adolf Mwafangeyo okwa ti onghalo yokuyandja ohonde paife oya xwepopala naashi otashi ulike kutya oshiwana oshi na ohokwe okuyandja ohonde.

Pefimbo a ninga eenghundafana naKundana onghela, okwa pandula oshiwana molwokuholoka momwaalu muhapu oku ka yandja ohonde.

Okwa yelifa ta ti paife onghalo yohonde kehangano lavo oi li xwepo mokufaafanifa nomudo wa dja ko.

Okwa hokolola ta ti ohonde ei tai yandjwa koshiwana ohai kwafele ovanhu ve na omikifi da yooloka ngaashi okaangela, pefimbo oomeme tava pulumuna, omunhu ngeenge ta tandwa nosho tuu omikifi dikwao.

Okwa weda po ta ti natango, ohonde ohai yandjwa kounona ovo va dalwa voupelema.

Mwafangeyo okwa yelifa ta ti eshi otashi ulike kutya ohonde oya fimana okuxupifa eemwenyo dovanhu ve li moipangelo.

“Ngeenge a tu lombwele oshiwana shi ka yandje ohonde ohashi kala tashi ti pamwe omashendjo. Omunhu ngeenge okwe lihange e li moshipangelo opo nee ha kala e na oudeko lefimano lohonde shaashi ye mu kwafela,” ta ti. Okwa lombwela oshiwana opo shi topolelafane ouyelele kombinga yefimano lohonde opo ovanhu va kale ve na eudeko la wana nokukala ve na ohokwe yokuyandja ohonde. 

Mwafangeyo okwa pula oshiwana opo shi holoke momwaalu muhapu okukayandja ohonde shaashi osha fimana.

Okwa ti omafiku 19 otava kala ve li moshipangelo shEenhana okudja 10h00 fiyo 18h00.

Okwa weda po ta ti omafiku 20 omwedi ou otava kala ve li pendiki lomangeshefelo natango modoolopa yEenhana.

Okwa pandula ovanafikola novalihongi aveshe ve na ohokwe yokuyandja ohonde shaashi eshi otashi tu ovanyasha vakwao omukumo.

“Eemwedi da pita otwa didilika oshitukulwa shaHangwena shi li pombada mokuyandja ohonde. Otwa pandula oshiwana,” ta ti.

Okwa ti NAMBTS ota twikile okukwashipaleka kutya ovanhu ve li momhumbwe yohonde koipangelo ova pewa ohonde opo eemwenyo davo di xupifwe.

-fhamalwa@nepc.com.na