Abraham Mwanyekange 

Oprimafikola yaShingunguma moshikandjohoololo Ongenga oya tameka eetundi dayo omwedi ou konima eshi kwa li ya pata molwonghalo yomeva efundja. 

Ofikola oya patele petameko lomwedi Marsa neudo. Ovalongifikola novalongwa ova alukila kenongelo konima eshi epangelo la landa nokudika ounhopa vopokafimbo ava hava kaama kombada yomeva. 

Ounhopa ova landwa okupitila moministeli woilonga nomalweendo opo va vatele ovalongwa, ovalongi osho yo ovanhu vomomudingonoko okutauka oishana yomeva opo kwa li itapa dulu okweendwa kolupandi. Konyala ovalongwa va koya 150 otava longifa ounhopa ovo mopaife okuya nokudja kofikola. Omukulunhufikola Grace Musheko okwa lombwela Kundana ta ti eetundi odi li nale metifa. “Ohandi pandula epangelo letu eshi le tu nyamukula meendelelo molwoupyakadi oo kwa li twa taalela,” ta ti. 

Musheko ta ti: “Mopaife ovalongi ova tameka nale okulonga molwaashi otwa li konima neenghono. Nonande tu na ngaho okamwaalu okashona kovanafikola tave ya olaata molwomeva oshixwepo ngaho hasho tashi tulifa omunhu omutwe kepepe osho.” 

Musheko okwa ti oku na elinekelo kutya ovalongwa otave ke shi endifa nawa kexulilo lodula molwaashi ofikola itai pate vali lo nehongo lavo otali wanifwa po ngaashi shi li pefinalongo lokodula louministili. Musheko okwa ti shimwepo shiwa osho sho kutya ounhopa itava longifwa ashike kovanafikola ndele novakalimo vopomudingonoko navo ova ningila ko elao. Ta ti keshe efiku oko ngaho nee hava ende oko opo va ka mone omakwafo keenhele depangelo ngaashi oipangelo. 

Omulongifikola Felix Shitana okwa ti ounhopa ova denga po oluhepo moshili. “Ohatu pandula ovaleli vetu eshi ve tu shaken eka ondjilakati. Otwa mona nale oixuna ndele omunhu naashi u li keumbo iho kofa oto diladila ashike ounona ovo tava shaala po kuvakwao molwofikola ya pata.” 

Okwa ti mopaife okuudite ombili nota longo e litula mo opo a mane ko omufindalongo wovalongwa vaye. 

Omanga Rebecca Haimbodi omulongi womondodo onhiheyali okwa ti okwa ninga eedula mbali ta ende momeva. “Iyaloo shili mopaife onda fa ashike ndi li modila itandi ende vali momeva okuya kofikola. Ohandi kala noku fika pefimbo opo ndihapitililwepo koilongwa yange. Otwa pandula eshi twa mona efilonghenda eli,” ta ti. 

Haimbondi okwa ti ewiliko lofikola ola ninga onghendabala opo ovadali va pitike okamwaalu kashona kounona ovo natango hava tauluka omeva opo ngeno ovalongwa va ka dje pofikola. 

Kakele ota ti ovadali vamwe inave shi pitika. Tali ti kulo oli wete kutya ovadali kave na oupyakadi molwaashi omeva nao paife okwa shuna pedu nounona otava fiki pefimbo keetundi. -amwanyekange@nepc.com.na