OSHIKANGO – Ngungula paife kOshikango ota ende ta shongola molwaashi paife opolifi otai longo nondjungu okukandeka Ovaangola ovo tava landifa omahooli.
Omukulunhu wopolifi moshitukulwa shaHangwena C ommissioner Otillie Kashuupulwa okwa ti ngeenge ova yi kOshikango paife oku na ovapolifi tava longo efimbo keshe ve li keengamba.
Kashuupulwa okwa yelifa ta ti eengamba kOshikango naAngola oda kondekwa ovanambelewa vopolifi tava longo nondjungu.
“Opolifi otai twikile okuninga omapekapeko momikunda osho yo okuhada meetuwa ngeenge tadi piti keinda lopolifi okutala ngeenge metuwa davo omwaholekwa omahooli,” ta ti.
Okwa ti noibofa yovanhu tava kwatwa nomahooli paife oya shuna pedu moshitukulwa shaHangwena.
Kashuupulwa okwa ti natango ovanhu onghee tava twikile okuninga oihakanwa yokunyekwa omaliko avo kOvaangola osho yo okudengwa.
Ovashingi voutaksi osho yo ovanhu ve na eetuwa dopaumwene ova pula opolifi opo ixulife po okutaaya Ovaangola ngeenge tava landifa omahooli kOshikango shaashi otava kongo ouxupilo.
Ongudu yovashingi votaksi monooli ova ti ovena ashike okutwikila okulongifa Ngungula kOshikango okuka mwefa omahooli shaashi paife ondado yomahooli oya wedwelwa.
Ova hokolola tava ti kuNgungula xwepo shaashi omahooli okuna ombilixa shi dulife okunwefa poitaashi yomahooli moNamibia.
Endini leelitela 20 kuNgungula oi na N$500 omanga okandini keelita nhano oke na N$100.
Ovanhu ovo ve li ovanashilonga navo ohava shingi eetuwa davo paife tava ka nwefa omahooli kuNgungula.
Omwedi wa dja ko epangelo ola shivifa pambelewa kutya ondado yomahooli otai wedelwa noshimaliwa sha londa pombada.
Onghundana ei oya eta ovashingi voutaksi opo va kale tava nyenyeta nosho yo okukufa onghatu yokukamwefa omahooli kuNgungula.
Edina Ngungula ola dja kOvaangola eshi tava lotoka va umbata oundina vomahooli hano tava ngungula alushe ngeenge va mona opolifi.
Natango omushingi wotaksi umwe, okwa hokolola ta ti paife oha dimbuka e na oshimaliwa shihapu shaashi oha nwefa omahooli kuNgungula oku kuna ombilixa.
Ovaangola ngeenge ova mono opolifi ohava faduka po va uka moixwa moshilongo shavo ve kwete omandini omahooli.
-fhamalwa@nepc.com.na