Opolifi oya lopota oshibofa shoulunga, konima eshi ookalyamupombo va ponokela ololi oyo ya li ya humbata ostoka yeeshi noku di vaka mo. 

Omupopiliko wopolifi moNamibia Kauna Shikwambi okwa ti omushingi wololi vati okwa hangika ta shingi okudilila kombinga Karibib, ye ta fuda po ngeno koshi yomuti eekilometa dishona okuya mOkahandja. “Omushingi wololi eshi a ka penduka okwa hanga ekoto eli la li la humba ostoka la patuluka,” Shikwambi ta ti. 

Konima eshi a ka tala konima yekoto ostoka yeeshi hanga aishe konyala oya li ko ngoo onghela. Konima yefimbo lixupi opolifi oya kwashilipaleka kutya oshihakanwa osha mona otuwa yo seven-seater tai piti po, ye ngeno te i mbilike apule ngeenge oonakushinga ohauto inava mona ava va longela ostoka yaye oushada. 

Ovakwashiwana ovo ve li ovafekelwa paife vati ova ponokela oshihakanwa, ndele tave shi tu neembele, noku shi manga neemwiya deenghaku dasho ndele tave shifiye moluxwa. Konima okwa kadula ngaho oku limangulula, ndele ta shuna popate opo a ka lefa omaloli oo e mu kwafa. 

Opolifi oya kwashilipaleka yo kutya nonande omufekelwa a lopota oshibofa, okwa kendabala ngaho oku toolola oupakete veli 10 veeshi, ovo a hanga va kupulwa moluxwa. Moshiningwanima sha yooloka ovakulupe ve li mepupi leedula 68 no 70 navo ova lopotwa va ponokelwa meumbo lavo mOutjo manga va li va kofa. Ovafekelwa vati ove va manga ndele tave vakufa oilwifo yavo yopaumwene, oimaliwa eengodi, nai kwao ya wedwapo. 

Ovafeekelwa moiningwanima ei fiyo opapa inava kwatwa, oo omakoonakono opolifi ota a twikile. 

-taimihaihambo2000@gmail.com