OMUNGWELUME – Omukulunhu wopolifi moshitukulwa shaHangwena Commissioner Otillie Kashuupulwa okwa ti fiyo opapa kape na omunhu a kwatwa po mekwatafano ledipao lomuhongifikola Natanael Nghihalwa a shivika nawa Thabo. 

Okwa yelifa ta ti ombelewa yaye inai lopotelwa natango ouyelele kombinga yovanhu tava ningilwa omapulapulo. 

Kashuupulwa okwa popya e likwatelela komahokolola taa di moshiwana kutya ope na ovanhu tava ningilwa omapulapulo mekwatafano ledipao lomuhongifikola ou. 

Edi okwe di popya onghela pefimbo a ninga eenghundafana naKundana. 

Okwa ti natango opolifi onghee tai twikile nokuninga omakonakono kombinga yedipao lomuhongifikola ou. 

Nghihalwa okwa xulifa pefimbo kwa li e na omido 39, omudo 2023 muNovomba efimbo loufiku konima eshi vati a yashwa nondjebo kovalumenhu vavali nokufaduka po. Oshiningwanima osha ningwa meumbo lavo momukunda Oshikwiyu moshitukulwa shaHangwena. Otaku hokololwa kutya Nghihalwa efiku olo okwa dja peendingosho yaye i li mOmungwelume omo kwa li e ke likosha. Okudja opo manga kwa li ta di kokalikoshelo okwa ponokelwa kovalumenhu vavali nokuyashwa lwoikando ya yooloka ndele ta xulifa. 

Ovafekelwa ova teta yo vali otuwa yaNghihalwa nomakatana komalola. 

Omuhongifikola ou meumbo okwa li e li mo namumwainamati pefimbo loshiningwanima. 

Oshiwana shomomudingonoko waMungwelume osho yo ovakwapata natango ove li momalimbililo va hala okuuda ouyelele woshili kutya Thabo okwa dipawa kulyelye. 

Onghela umwe womumwainamati waNghihalwa okwa popya ta ti kave udite ombili shaashi vati opolifi itai longifa ouyuuki moshibofa eshi. 

“Ope na omunhu taku fekelwa kutya oye a dipaa ondenge yange ashike fiyo opapa opolifi kai na eshi ya ninga po. Fye ongofamili otwa handuka,” ta ti. 

Okwa vela opolifi ombedi ta ti inai litula mo okuninga omakonakono moshibofa eshi. -fhamalwa@nepc.com.na