ǀAEǁGAMS – !Hau!hausasen ge 103 !nabana !kharu ge disi kurigu !nâ mā-ams ose !gamhe hâ. Nēna xun 95 a ǂnū !naba tsî !gau ra ǁkhaisana !uri !nabase. !Nāsa !gamǂuis !nae!khaidi ge Etosha ǀGuru!hanab !nâ a !nurisa, Ministris ǂNamipeb tsî !Narisarimas dis māǂui hâ !nurigu !oagu. ǂOago ǁkhâb !nâs ge Ministris ǂNamipeb tsî !Narisarimas disa laboratoriums !nâ ra dīhe !âide ge dī, ǂanǂuis nîga ǁnā ǁō hâse ge Etosha ǀGuru!hanab tsî nau hâ !hanagu Namibiab digu !nâ, 2014 xu nēsis kōse a hōhe !naban tsî ǂkhoan di ǁōgu di !aromade ǂanǂuis !aroma. Nē !nurigu ge ǂoago wekheb Denstaxtsēs ai ge ǂanǂanhe. Ministeri, Ministris ǂNamipeb tsî !Narisarimas dis dib, Pohamba Shifetab ge ge ǂanǂan, ǁnā ǁaeb !nâ ge ǁō hâse hōhe !nabana xun 39na ge !gamhe tsî 29na ǀaen xa a ǁōsa. ǂKhoan ǀkhāb ain ge 23na nē kurib !nâ nēsis kōse !gamhe hâ. ǁNāna xun ge 21na Bwabwata ǀGuru!hanab !nâ tsî nau ǀgamna Mashi !Aub!ûi!gâs hâra Zambezi ǀKharib !nâ ǁgoera !nâ. Shifetab ge mîsa !oan ge khoena nē !gamǂuidi ǂnamipe !khōsis !nâ ge ūhe. Namibiab ge ǂgui !gôab !nâ hâ !naban tsî ǂkhoana ǀhôakao !audi ǀkha mā-ams ose a ǁaxa khoen xa !aromahe hâse ge ǂoa!nâ, !gôa!gôab ai 25 !nabadi tsî 78 ǂkhoan tsîna 2014 kurib ǀguib !nâ, !hūb a ǂhabase. Nē kurib !nân ge 68 !nabana ge !gamhe ǁîna xun 62na Etosha ǀGuru!hanab !nâ tsî nau hakana Kuneneb !nâ ge hōhese. ǀGamdisiǀguiǀan ge !nurihe rasa !oa ǁî!nāpe hâ mâsigu !naka ge ǁō, aiǁgause !khamǂuigudi.
310 !Naban, ǂnūn tsî !urina !khōǂgā hân ge !aub di mâsigu xa 2005ǁî kuriba xu nēsis kōse ge ǁōǂoa. Ministeri ge ge mî, ǂgui ǀaweǁguigu dīhe hâsa mā-ams ose !gamǂuis nēsa ǀamǀam tamas ka io ǀoroǀoros !aroma tsîs ge ministrisa ǀgaisase Namibiab ǀAwa!namn ǀkha ra sîsenǀhao. ǁNāpan ge ǀhaeǂhôana ge hâ i ministris sîsenaon hîa !aub !nâ ra sîsenn tsîn !gamaon ǀkha ra sîsenǀhaosa. Shifetab ge nē ǂgā-ams ai ge mî, ǁîb ǂnoa!oa tamas ka i o ǀhûǀgui tama hâsa, xawe !apudi nē sîsenaon didi ai ra dīhe ôa!nâdi îsedi ge ǁîde ǁnāti ī !gamǂuidi !nâ sîsenūhe tama hâ isa ôa!gaos didi !nurigu khao!gâ ǀgui xū-e nî mîǂgāsa. !Aruǀîb ge ministera ge mî, ǁîb ministris ge ǀkhamasa mîǁguiga a ūsa, aiǁgause-i ge khoe-e ǁî-i !apun ǀkha !aruǀî ǀguru!hanagu !nâ ǂgâsa mā-amhe tide. ǂGurosa i ge nēti ī !apuna gere !gaeǂganamhe, xawes ge nēsa a ǂgom!gâhe ǁoa khoe-i !apuna !aus !aroma sîsenūtoa tsî -ǁnāpa xu ǁ-khawa a !gaeǂganam ǁkhā xui-ao. Shifetab ge hoa ǀhûhâsiga ra ǂgan î da hoatsama ǁkhaubas di !â kai tsî sîsenǀhao sada ǁuiba sâus !aroma.
Xoa-aos: Albertina Nakales