KATIMA MULILOS
!Nona sorodi Namibiaǁîgu hîa ge Mauns !nâ a ǂnoa!anhe gu didi, ǁnâgu !aus ǀkha ra ǂâisāhegu didi ge Maunsa xu Zambezi ǀKharib ǁga ge oahā-ūhe.
Nē sorodi ge Katima Mulilos ǂHanusi ǀAeǁgâus ǁōhâ sorodi !khai!khaiǂgaes tawa ai!â gere ǂoa Fraitaxtsēkam !uia ge hā-ūhe. ǀAokhoe-i ge Nampasa gere mîbasa !oagu ge nē khoega Botwsanab ǁKhaubas ǁAnigu xa ge ǁnāǂamhe tsî haka ǂkhoa ǁnâga ǁîgu ai ge hōhe.
!Nae!khais ge Chobe !Āb ǀnomammi ai ge ī, Shakawes hîa Botswanab huriǂoas ǀkhāb ai ǁgoes tawa. ǁNâgu nēgu ge ǂâihe rasa !oa Chobe ǀGuru!hanab ǂkhoan di ge i. Nē khoegu ǀkha ge hâ i gu ge noxopa ǀnî hâ !nona Namibiaǁîgu tsî ǀgui Zambiaǁîb hâga.
ǁÎgu ge mā-ams ose 12 !Khaitsâb dis ai !āb ǀnomamma-ū Botswanab !nâ ge ǂgâ. “Sida ge ge mîbahe, Botswanab ǁKhaubas ǁAnigu ge ǀōǂgaehesa nē mā-ams ose ǁnā !â!âb ai hâ !au-aogu xa tsî gu ge -ǁîga nē khoega sâusase !āb ǀmomammi ai ǁîgu di ǂgaurode gu ge mûpa ge !âuǁgoe i, ǁaupexa haka tsēdi -ǁaeba. Nē hû khoegu ge haiǀgomsa xu 15 !Khaitsâb dis di ǁgoa!aroma irdi ai a ǂoaxa ǂgaudi ai gu nî ǂoase, !nubai gu ge nē ǁâtanisa ǁkhaubas mâisaga ǁîgu ai ge ǂnoatsoatsoa, ǀgamkha !khais ai ǂnoa!an tsî ǀgamkha ǁkhoms !nâs tsî !nūkha ai ge tsui.
Nē ge tsuihe ǀkhamkha xab ge ǁkhoms !nâ ge tsuiheba ǁgam-i !nâ ge ǁnāǂgâ tsî mîhe rasa !oa Namibiab ǀkhāb ai tsâ!gau tsî Zambiab ǁga ge !kharu ǁnāpab si ra ǀae!khōhese.
Naub ǀnūkha !nâ ge ǂnoaheb ge ǁnā !khais ai kai ǀaoba ǂoa!nâ tsî ge ǀomǀuni. Nau ge ûi!gaugu ge mâb hoaba ǁîb ǀkhāb ǁga ge ǁhaini, mâpa gu nēsis kōse hâs a ǀūsase,” ti-i ge ǀons â-e mā tama ge i ǀaokhoe-e ge mî.
ǂOago wekheb a i ge Confidente ǂhôaǂkhanib !nâ gere !nurihe mâtis nē !gamsa ǂkhîo!nâsiba Namibiab tsî Botswanab hâga ǂhanukha ǁaegu ge hā-ūsa, ǁnāpadi ôa!nâde ra ai!gû tare-i !aromas ge ǂnoasa a hâsa hîa.
Botswanab ǁKhaubas di ǂHaitsi ǁHōn Mâisab, Colonel Paul Sharpi ge nē !gamsa ǂan!gâ tsî ge mî, nēs !gamǂuihes ǂkhoan tsî !naban dis hîa ai!gû rase Chobe !Āb ǀnomammi ai tsēkorobe ra hō!âhesa ǁkhaubas xa ge hirihiri!nâhesa.
– Nampas