WINDHEOK – Likwambuyu wa Likolo la Milonganyana, Mandu ni zwelopili ya Libaka za Matakanyani Charles Namoloh u ize, kuňatafala kwa likupo zakuba ni likuta zasizo lisusuwezwa ahulu ki pene yeo muuso u lifa malena ba sizo bao bazibahalizwe ki muuso.
Hanabulela kwa puteho ya bu 17th ya silimo, ya mazazi amane (4) ya katengo kakabona za malena ba sizo (Council of Traditional Leaders) maabani kwa sibaka sa hotela ya Safari, likwambuyu na ize yomumwi-niyomumwi sabata kuba mulena kuli afumane tuwelo. Malena ba sizo mwa Namibia ba amuhela tuwelo yefita fa N$23 040 ka silimo, yeo itisa N$1 920 ka kweli, kacwalo muina sipula wa katengo kakabona za malena ba sizo u amuhela N$28 800. “Onafa lubasi ni lubasi selukaba lubile ni mulena kalibaka la mashelenyi,” a talusa. Na ekelize kuli muhupulo wa kufa mali kwa bahali ba ndwa kakuitumela kwakalulo yeo nebabapalile kwa tukuluho ya naha, buňata bwabatu sebakala kuipiza kuli ki bahali bandwa (war veterans). Hana bulela kwa mukopano woswana yona sunda ye, Mueteleli wa naha Hifikepunye Pohamba u file mamela yakuli likuta za sizo ze ňata ňata mwa naha lita lubaluba buiketo ni kuabana fahali. Pohamba natalusize kuli u puwana mwahali alikupo zeňata-ňata zakubata kuzibahazwa kwa likuta ze ncha za sizo, mi u kupile bazamaisi ba likuta za sizo zeliteni kwateni mwa nako ya cwale kutusa kutimisa mukwa wo. Muuso u bilaezwa ki kuňatafala bwa likuta sa sizo zeo lisina mayemo sakata, mwa lilimo zesa zofela. Pohamba u ize mukwa wo u katisa sitataliso, kuabana, kusaba ni kutwano mwahali a sichaba, kungelela ninaha mwa bupala ni kuekeza kuli mukwa wo uswanela kuambukwa.
“Kacwale ni inzi ni likupo ze ňata-ňata za baeteleli bao babata kuzibahazwa kuba malena ba sizo,” a ekeza mueteleli wa naha. “Nina sepo yakuli katengo kakabona za malena ba sizo kaka nifa kelezo yetezi mwa taba ye,” Pohamba na bulezi la Mubulo. Mukopano neunguzi maabani. Kachenu malena ba sizo batabe babile ni kuikatulusa kwa sibaka sesizibahala ka Club Thriller mwa Katutura hamoho cwalo ni kupotela sibaka kokubulukwa bahali, sa Heroes’ Acre.